(NLTimes) – Kamil E., un di e sospechosonan den e asesinato di reportero specialisa den crimen Peter R. de Vries, a ahusta su declaracion duna anteriormente den corte di Amsterdam riba diamars.

Awo e ta declara cu un tercer homber tabata den e auto conhuntamente cu e otro sospechoso, Delano G. ora cu nan a bay di Rotterdam pa Amsterdam. Segun E., e homber Polaco a sali for di auto despues di G. pa motibo cu e mester a “bay haci algo.”

E homber di 36 aña, E., ken ta e supuesto chauffeur den e asesinato di De Vries nunca a menciona e tercer homber aki anteriormente y no tabata kier bisa nada mas “pa motibo cu e no ta aresta.” Camara di vigilancia no ta mustra un posibel tercer sospechoso, aunke E. y G. frecuentemente ta aparece den e grabacion.

G. a nenga di comenta riba e tercer homber aki. “Mi ta haci uso di mi derecho pa permanece den silencio,” el a bisa. Te ainda e tin cu duna comentario of declaracion tocante e acusacionnan den su contra. Public Prosecution Service (OM) ta alega cu G. tabata e persona cu a duna e tiro. Investigadornan a haya restonan di e arma di candela riba su man. E hues a puntra si e por a splica esaki, na cual G. a responde bisando “No.”

De Vries a ricibi tiro fatal dia 6 di juli aña pasa den e curason di Amsterdam. El a fayece pa causa di su heridanan 9 dia despues. Cuerpo policial a resta E. y G. menos di un ora despues di e tiroteo riba e caretera A4.

Cuerpo policial a haya e arma usa y un telefon unda cu nan a mira mensahenan crudo tocante e asesinato. E sospechosonan a comunica cu un persona cu aparentemente tabata controla e par. Te ainda cuerpo policial ta investigando su rol.

Corte a mustra varios imagen y grabacion di e incidente, incluyendo trabao preliminar cu E. a conduci. De Vries tambe por ser mira den e imagennan y con e asesinato a sosode por a ser mira. Mientras cu De Vries tabata canando direccion pa su auto, e sospechoso a bini su tras y a los varios tiro riba De Vries. Corte a adverti e sala di e imagennan di adelanta, causando cu De Vries su yiu muhe Kelly a sali for di e sala temporariamente.

Otro imagennan a mustra e sospechoso coriendo for di e escena, y aparentemente a manda un mensahe na e homber cu te ainda no ta identifica cu a dirigi e asesinato. E mensahe tabata bisa cu e sospechoso a los tiro riba De Vries y esaki a “pasa straight door di su cabes y curpa” y cu el a fayece.