Un serie di eror grave di polis y sistema di husticia tabatin consecuencia negativo pa e investigacion riba e hit and run fatal di trafico dia 27 di october 2024 na Paradera, den cual Julieth Patricia Patiño a perde su bida.
Esaki a keda reporta pa portal online, Aruba.nu.
E prome eror tabata e aresto di un muhe inocente tiki despues di e incidente. Awo a bin dilanti tambe cu e sospechoso principal den e caso a keda deporta sin cu su huicio criminal a bin dilanti prome.
Inmediatamente despues di e accidente, manera Bon Dia Aruba tambe a reporta anteriormente, polis a aresta un muhe Venezolano di 30 aña di edad, basa riba imagennan di camara di vigilancia y e modelo di vehiculo involucra den e accidente. Sinembargo, despues di interoga e persona aki y mas investigacion, a keda cla cu e no tabata involucra den e incidente, y el a keda den libertad.
Algun dia despues, e chauffeur sospechoso di a causa e accidente fatal, Jesus ‘Deditos’ Rosendo, un Venezolano di 44 aña di edad, a entrega su mes na warda di polis na Balashi, compaña pa su abogado. El a admiti di ta e chauffeur cu a dal Patiño y despues a huy di e escena.
Februari ultimo, Rosendo a presenta dilanti hues pro forma, unda hues a dicidi di no prolonga su detencion prome cu huicio.
Tiki despues, Warda Nos Costa a detene Rosendo, pa ta kedando ilegalmente na Aruba. Y sin importa e hecho cu e tabatin un caso habri na Aruba, el a keda deporta, lagando asina e proceso fiscal den problema.
