(AP) — E homber acusa di asesina Charlie Kirk a expresa oposicion contra opinion di e activista conservador y a indica cu e tabata responsable pa e asesinato, segun autoridadnan Mericano a bisa ayera mientras nan a anuncia un aresto den e asesinato cu a genera alarma tocante violencia politico den un Merca altamente polarisa.
Tyler Robinson, 22, a bira “mas politico” den e dianan prome cu e tiramento, y a menciona durante un cena cu su famia cu Kirk lo ta bishitando Utah, segun gobernador Spencer Cox a bisa durante un conferencia di prensa. E gobernador a cita como evidencia grabacion den huls di bala encontra den e rifle cu autoridadnan ta kere a ser usa den e asesinato, como tambe mensahenan den app di chat atribui na e sospechoso, cu un compañero di camber a comparti cu agentenan di ley.
“Damas y cabayero, nos a gar’e,” Cox a bisa un conferencia di prensa tiki despues cu presidente Donald Trump a anuncia e aresto riba “Fox & Friends.”
Ta kere cu Robinson, kende ta di Utan, a actua riba su mes, y e investigacion ta andando, Cox a bisa. El a keda aresta bao sospecho di asesinato capital, y ofensanan di arma y obstruccion. Ta spera cu e ta bay keda acusa formalmente otro siman prome cu un audiencia inicial den corte.
E aresto di Robinson laat diahuebs a completa un buskeda frenetico di un dia y mey, cu apenas oranan prome tabata parce stanca mientras autoridadnan tabata suplica pa publico comparti tips.
E asesinato a captiva e publico, no solamente pa motibo di e influencia grandi di Kirk den circulonan politico conservador y su conexionnan cercano cu Trump, pero tambe pa motibo di e preguntanan urgente cu a genera tocante e costo escalando di violencia politico cu a bin di henter e spectrum politico.
Autoridadnan ainda mester revela un motibo, pero nan a describi evidencia cu nan ta bisa ta pone luz riba e asesinato. Esey ta inclui grabacion riba huls di bala recupera for di e rifle cu ta kere a usa den e atake, incluyendo un cu tabata bisa “Hey facista! Catch!”, Cox a bisa.
Ademas, un roommate a comparti cu autoridadnan mensahenan di e app di chat Discord cu a involucra un contacto yama Tyler y a discuti un rifle lora den un serbete, huls graba, y un scope, e gobernador a bisa. A haya un rifle Mauser calibre .30 den un serbete den un area riba e caminda investigadornan ta kere Robinson a tuma despues di tira for di un dak y despues huy.
E paña cu e sospechoso a bisti ora autoridadnan a confront’e diahuebs laat tabata consistente cu loke e tabatin bisti ora el a yega e campus un dia prome, y un familiar a confirma cu e tabata core un Dodge Challenger shinishi, cu video di vigilancia a capt’e coriendo bay e universidad, Cox a bisa.
Tata di Robinson a reconoc’e for di e potretnan publica pa FBI y a bis’e pa entrega su mes. Na comienso, Robinson a nenga, pero despues a bay di acuerdo. Su tata a tuma contacto pa pidi ayudo na su pastor hubenil, kende tambe ocasionalmente ta traha cu US Marshals y a yama e agencia pa asina Robinson por entrega su mes na autoridadnan.
