E sospechoso den un incidente mortal di hit-and-run cu a cobra bida di dos peaton na comienso di januari ta keda cera mientras cu autoridadnan ta sigui cu nan investigacion.
Dia 8 di januari 2026, Hues Comisario a aproba e peticion di Ministerio Publico pa prolonga e detencion di e sospechoso, ken a ser identifica den comunidad y riba rednan social como C. Fernandes di 24 aña, cu 14 dia. E extencion a ser otorga pa duna investigadornan tempo adicional pa completa trabou forensico y recoge evidencia prome cu acusacionnan formal ser presenta.
Fernandes a keda deteni pa prome biaha despues di e accidente fatal cu a sucede riba 4 di janauri poco prome cu 12or di anochi riba L.G. Smith Boulevard banda di Renaissance Mall. Un SUV color scur, cu e sospechoso tabata maneha, a dal Josely Paulina Vasquez Gonzalez (65) y Carlos David Vialez Valerio (54), tur dos di Republica Dominicana, lagando benta riba caminda y a sigui corre bay.
Autoridadnan a localisa y tuma e SUV den beslag den area di Bushiri na Oranjestad, y Fernandes a ser deteni un rato despues.
Bon Dia Aruba a tuma contacto cu Ann Angela, vocero di Ministerio Publico, ken a confirma cu e sospechoso ta deteni ainda y e fase di detencion actual a cuminsa dia 22 di januari 2026, y lo dura te cu 90 dia mas mientras cu e trabounan di investigacion ta sigui.
Ta spera cu autoridadnan lo enfoca riba completa recaudacion di evidencia, entrevista testigonan, y reconstrui e circumstancianan di e accidente prome cu cualkier acusacion formal ser presenta formalmente.
