Mientras cu su caso ta programa pa ser trata riba contenido na februari proximo, sospechoso den caso ‘Bromelia’, K.V., kende ta acusa di malversacion, fraude, labamento di placa y abuso di su funcion como ambtenaar, actualmente ta kedando na Slovakia, na un adres desconoci pa autoridadnan na Aruba.

Esaki a sali afo durante un audiencia preliminar di e caso diabierna ultimo, segun a keda reporta den medionan di comunicacion local.

Caso Bromelia
 Tabata na october 2024 cu Stichting Sportsubsidie Aruba (SSA) a informa cu a duna retiro inmediato na director Kenneth Vrolijk, pa motibo di iregularidadnan.

Stichting Sportsubsidie Aruba (SSA) a indica cu nan a entrega un keho dia 25 di september 2024 na autoridadnan di Landsrecherche pa iregularidadnan detecta dentro di e fundacion.

Mediante un comunicado, nan tambe a informa cu “e iregularidadnan detecta ta regarda transaccionnan financiero sin cu e obhetivonan deportivo planea a wordo realisa. SSA ta laga e proceso aki den man di e autoridadnan hudicial corespondiente pa haci nan trabao.”

Tambe tabatin controversia pasobra e director di SSA tabata un persona cercano na ex-prome minister Evelyn Wever-Croes (MEP). Wever-Croes e tempo aya a señala cu “berdad ta trata di un persona cu ta toca na mi famia, pero no ta pa e motibo ey cu el a wordo encarga cu e puesto, sino tur su preparacion financiero na universidad y despues den deporte. A pensa cu e ta e persona cu por a wordo confia cu e posicion, awor tin sospecho di malversacion.”

E malversacion aki tabata calcula na alrededor di 158mil florin den fondo di subsidio.

Controversia ocasiona pa caso Bromelia eventualmente a resulta den retiro di Endy Croes como minister di Deporte na 2024, despues cu Parlamento a vota pa aproba un mocion di desconfiansa contra e minister, despues di un sesion largo. Parlamentarionan a considera cu e no a maneha e informacion den e caso aki di un manera adecuado y no tabata satisfecho con e situacion a desaroya.

Ausencia di e sospechoso
 Algo cu a hala atencion diabierna ultimo durante audiencia den e caso tabata ausencia di sospechoso K.V. Su abogado, Vito Carlo a indica cu e sospechoso ta bibando den exterior actualmente, specificamente na Slovakia. Den e procedura, ta lista su adres como “desconoci.”

Esaki a crea algun incertidumbre, pa motibo cu segun ley, mester entrega e dagvaarding na e sospechoso den su propio man cu algun dia di anticipacion. Door cu su adres actual no ta conoci, a pesar cu funcionarionan di ley di Aruba a haci nan esfuerso pa cumpli cu e rekisito aki, no a logra. Medionan local a reporta cu hasta a pone e documento pafo di corte ya cu no a keda otro opcion.

Defensa di K.V. a purba di argumenta cu e citacion no tabata valido pasobra e lo a cay fuera di e limite legal di tempo, pero e hues a rechasa e argumento aki. Segun hues, ya cu e sospechoso no a duna su adres, e manera publico con a post na Aruba tabata legal y dentro di e limite di tempo.

Tampoco Landsrecherche por a interoga casa di e sospechoso, loke a stroba nan investigacion.

Abogado Carlo a indica cu e sospechoso no tin ningun plan di bolbe Aruba, a pesar cu segun Hues, ta spera cu e sospechoso ta bay ta presente fisicamente pa e tratamento di e caso na februari. Hasta si e no presenta, e caso lo bay door.

Confiscamento

Un aspecto di e caso ta e ontnemingszaak pa e placa cu a malversa. Durante e audiencia preliminar, a bin dilanti cu e cantidad total di placa den e caso aki tabata Afl. 181,352.
Despues di anteriormente admiti na e iregularidadnan, e sospechoso lo a ofrece pa paga e placa back, y segun su abogado, el a logra haci e pago aki completo na SSA.

Pa motibo cu a paga e placa back caba, Ministerio Publico a dicidi pa no sigui cu e caso di ontneming pa confisca e placa mas. Sinembargo, a keda e aspecto di daños, cual ainda K.V. lo mester compensa y resolve e caso directamente cu e fundacion. Ta papia aki di un suma di 190mil florin, cual hues a indica ainda mester determina si e sospechoso lo mester paga e placa aki back.

Otro sospechoso
 Durante e audiencia diabierna ultimo a bin dilanti cu tin mas persona cu a keda declara como sospechoso den caso ‘Bromelia.’

Esaki ademas di e tres persona cu a keda identifica na october 2024. Minister di Deporte e tempo aya, Endy Croes, a bisa na october 2024 cu tabatin tres persona cu lo tabata ricibiendo subsidio “pero no tabata organisa pa e proposito cu nan ta manda un carta aden.”

Augustus ultimo, actual minister di Deporte, Gerlien Croes (Futuro) a informa cu a suspende presidente di SSA, H.R., pa motibo cu e ta sospechoso den investigacion di caso Bromelia. H.R. a asumi e funcion di director despues di suspension di K.V.

“Como minister encarga mi a wordo informa (…) riba un investigacion penal tumando luga den Stichting Sport Subidie Aruba unda cu e Presidente di e Raad actual ta un sospechoso,” minister Gerlien Croes a publica riba Facebook na augustus. “E persona concerni ta alabes un trahador di sector publico di un departamento cu ta resorta bou di mi ministerio, consecuentemente, segun ley ta prescribi mi a emiti por escrito un suspension temporal di e persona aki su trabou, pendiente investigacion.”

Segun reportahenan den prensa local, tabata H.R. mes a entrega e keho formal contra K.V., pero despues a resulta di ta sospechoso den e mesun caso.

Mientras tanto, tratamento di caso contra K.V. ta programa pa dia 6 di februari 2026.