Aruba a keda impacta door di un crimen grave cu a tuma luga dia 23 di augustus 2025 na Coba Lodo, ora un homber a perde su bida den un incidente violento cu aparentemente tin su raiz den un conflicto familiar. I. Paesch, ta ser considera como sospechoso principal den e morto di Rene J. Paesch, un homber di 34 aña naci na Aruba.
Segun informacion oficial di Cuerpo Policial di Aruba central di Polis a ricibi un yamada pa 6:07 di mainta cu tabata indica cu un persona tabata benta band’i caminda despues di scucha varios tiro. Patruya y ambulance a ser manda cu urgencia, pero na yegada paramediconan no por a salba e victima. Dr. Voskuil eventualmente a constata morto di e homber, y e curpa a ser tuma den beslag pa investigacion adicional.
Polis a detene un homber, I. Peasch, relaciona cu e suceso y a confisca un auto y un brommer como parti di e investigacion. Segun informacion cu tabata circula den medionan di comunicacion y riba rednan social ta cu e victima a ser tira pa su propio primo, autoridadnan no a confirma oficialmente esey durante e fase inicial.
Despues a sali na cla cu e incidente a sucede pa motibo di un diferencia di opinion cu tabata andando pa un tempo basta largo caba entre e dos hombernan.
I. Paesch ta ser acusa di tuma intencionalmente bida di un persona door di haci varios disparo y dal’e ripitidamente na su cabes. E ta ser acusa tambe di posesion di un arma di candela, municion, y cocaina riba mesun dia di e crimen.
Awe 4 di december, I. Paesch ta presenta den Corte compaña di su abogado, Zuhaila Arendsz-Marchena, pa e audiencia preliminar, e asina yama regiezitting. E audiencia preliminar ta solamente un sesion Pro Forma, loke ta nifica cu e caso no lo ser trata den profundidad durante e sesion aki. Durante e sesion, e acusacionnan contra e sospechoso lo ser lesa, y e hues lo fiha un fecha nobo pa e audiencia principal.
