Spaans Lagoen su balor arkeologico: Prome habitantenan na Aruba ta situa na Spaans Lagoen

Spaans Lagoen ta un di e 16 area protegi. E ta bao proteccion di Fundacion Parke Nacional Arikok (PNA) pa su gran bio diversidad. Pero Spaans Lagoen tambe tin un gran balor cultural y historico.

Pa arkeologo Harold Kelly di Museo Arqueologico Nacional Aruba (MANA) e hecho cu PNA ta encarga cu Spaans Lagoen ta brinda un proteccion adicional. Ya cu e ta considera Spaans Lagoen como e sitio di prome yegada di e prome habitantenan cu a bin Aruba den tres diferente periodo of tres ola di migracion.

Aworaki cu e ta wordo proteha, e ta haci cu e sitio no ta wordo destrui dor di construccion of otro actividadnan. Pero tambe e ta bira un proteccion pa e contenido di e sitio mes, cual ta bay yuda pa haci investigacionnan den futuro ya cu tin shete sitio na Spaans Lagoen y nan a yega di fecha varios di nan.

Prome habitantenan

Informacion recien ta indica cu e prome periodo di habitantenan na Aruba, ya no por wordo referi como pre-ceramico mas. Tin hallazgo importante cu a keda descubri, y segun Kelly banda di Spaans Lagoen tin dos fechamento. Un di 1.465 over 1.500 aña prome cu Cristo. E di dos fechamento ta di 1570 pa 655 aña despues di Cristo. Esaki ta un indicacion cu e luga di yegada di e prome habitantenan na Aruba ta situa na Spaans Lagoen. Tambe nan tabatin ceramica.

Tur esaki ta haci cu e periodo no ta wordo relata como pre-ceramico. Ya cu antes e periodo di e prome yegada tabata wordo considera como e periodo pre-ceramico. Tambe tabatin un fechamento relativo di alrededor di 2500 aña prome cu Cristo te 1000 despues di Cristo. Pero e fechamento cu nan a haya a trece cambio den esey.

El a splica cu e personanan cu a wordo dera den e area aki di Spaans Lagoen tabata tres persona: dos adulto y un mucha. Nan a ser dera cu e mesun caracteristicanan similar cu esunnan descubri na Malmok y Canashito. Nan tabatin un relacion cu calichi. Nan tabata dera den un habri chikito caminda nan tabata dera cu piedra di calichi y tambe nan a wordo tapa cu e mesun tipo di piedra.

El a agrega cu banda di esey, nan a wordo dera cu e casca di e turtuga cual ta indica e diferente ritual cu tabatin rond di e deramento. Den e caso aki no solamente e adultonan, pero e mucha tambe a haya e mesun tipo di atencion funerario.

Arkeologo Kelly a afirma cu importante ta cu e caracteristica aki ta similar cu esunnan cu nan ta wak den e deramentonan na Malmok y na Canashito. Pero e diferencia ta cu -specialmente na Canashito unda nan a haya un santana grandi caminda tabatin entre 60 pa 70 hende dera di cual 60 a wordo saca- e personanan cu tabatin un posicion central den e deramento tabata haya special tratamento den e ponemento di e piedranan di calichi y e casca di turtuga.

Pues e hecho di e mucha cu a wordo dera cu e mesun caracteristica aki den area di Spaans Lagoen, si ta wordo diferencia di esun na Canashito y Malmok. E ta indica cu tabatin otro tipo di dinamica social cu a tuma luga den e area di Spaans Lagoen.

Igualmente e ta evidente cu tabatin dos diferente tipo di actividad den e sitio mas bieu di Spaans Lagoen. E di prome tin e actividad di subsistencia di explora y tambe di consumi cuminda marino. Spaans Lagoen ta un luga cu ta duna acceso na e parti interior di e isla. Si bo ta bin di tera firme, facilmente bo por drenta den e isla pa haci bo actividad di exploracion.

Banda di esey e ta un luga cu ta rico na cuminda marino, y tambe tin hopi vegetacion cu ta bira un habitat di parhanan cu tabata un sorto di cuminda pa nan. Pero e di dos ta e parti di actividad di deramento. Nan a dera personanan cu tur nan ritual di deramento. Nan a wordo dera den e sitio cu tabata mas bieu.

Parti pazuid di Aruba

Otro aspecto importante tin di haci cu banda di esey nan a haya informacion unico na Seroe Colorado relaciona cu otro deramento. Danki na e hallazgo aworaki nan ta sigur unda nos prome habitantenan a biba den e parti zuid di Aruba.

El a indica cu e ta un area basta bashi, pero e tin di haber pa motibo di e refineria y tur e construccion cu tabatin e tempo aya. Pero e tipo di descubrimento aki ta duna nan un indicacion mas cla cu nos prome habitantenan tambe a biba den e parti zuid di Aruba tambe. E ta un area cu tin hopi rikesa marino tambe y arkeologo Kelly a laga sa cu ta hopi probabel cu full e area di e refineria tabatin presencia mas habri di e prome habitantenan na Aruba.

Durante MANA su actividad den cuadro di Dia di Betico, Kelly a bisa cu ta importante pa conoce nos historia y nos origen como Rubiano. Pero e informacion cu MANA ta haya ta indica cu tur hende durante tempo a bin Aruba, ya sea for di tera firme of for di otro caminda. Nan a establece y nan a ‘florece’ riba Aruba.

Aunke el a wordo considera como un isla inutil dor di Spañonan, e isla aki a provee e personanan cu suficiente recurso pa nan por sobrevivi. Pero pa nan por biba bon tambe. “Esey bo por wak cu e personanan den pasado, desde comienso, tabata haya e manera pa biba riba e isla aki,” el a bisa.

Cu tempo e ola di migracion pa Aruba a bira mas diverso locual ta indica cu nos tur aki ariba na Aruba ta bin di un caminda. E ta haya cu e parti di e sentimento Arubiano tin di haci cu bo ta biba den conexion cu e isla. Ya cu actualmente nos ta biba cu mas cu 90 diferente nacionalidad riba Aruba, cual ta masha hopi mes, pero tur hende ta sinti nan mes Arubiano.

E tin mas di haber –segun e arkeologo Harold Kelly- con bo ta sinti bo mes na Aruba como un hende cu ta biba y sinti amor pa e luga cu bo ta biba ariba dje.