(AP) – Spaña su minister di Economia ta bisa cu miyones di turista cu ta bishita e pais tur aña ta presenta un desafio pa Spaña su residentenan cu e gobierno no por ignora mas.
Aña pasa, Spaña ta ricibi un record di 94 miyon bishitante internacional, cual ta haci esaki un di e paisnan mas bishita den mundo. E por ricibi te hasta 100 miyon turista e aña aki, segun algun proyeccion.
“E ta importante pa compronde cu e cifranan record aki den termino di turismo tambe ta posee desafionan,” minister di Economia Carlos Cuerpo a bisa den un entrevista diamars cu The Associated Press. “Y nos tin cu atende e desafionan aki pa nos propio poblacion.”
Turismo ta keda un sector clave pa e nacion su economia, cual a crece mas lihe cu cualkier otro economia avansa den e ultimo aña na 3.2%, y ta proyecta di crece na 2.4% e aña aki, segun banco di Spaña, hopi mas ariba cu e averahe anticipa di e asina yama ‘eurozone’ di 0.9%.
Sinembargo un crisis di vivienda terco den cual costo di huur y cas a aumenta drasticamente den ciudadnan manera Madrid, Barcelona y otro sitionan a causa un frustracion creciente tocante un aspecto conecta na turismo en particular: e plamamento di di apartamento pa huur di termino corto den e centro di ciudadnan.
E pais a mira varios manifestacion grandi cu a atrae miles di persona pa exigi mas accion di gobierno riba vivienda. Borchinan na manifestacionnan cu slogan manera “Saca Airbnb for di nos barionan” ta señala na e rabia creciente.
Den respuesta, e gobierno recientemente a anuncia cu e lo tuma accion contra Airbnb cual e ta bisa tabata operando den e pais ilegalmente, un decision cue compania ta apelando. “Nos ta un pais di 49 miyon habitante,” Cuerpo a bisa. E cifranan record di e turistanan ta ilustra “con atractivo nos pais ta, pero tambe e desafio cu nos tin pa loke ta trata provee un bon experiencia pa turistanan pero na mesun tempo evita cobra demasiado pa nos propio servicionan y nos propio vivienda,” el a comenta.
Banco de España recientemente a bisa cu e pais tin un deficit di 450,000 cas. Crea mas cas publico ta critico pa resolve e problema, Cuerpo a bisa. Spaña tin un cantidad mas abao di vivienda publico compara cu cualkier otro pais den e Union Europeo (EU).
“Esaki ta e clave pa e termino aki,” e minister a bisa di e pais su problemanan.
Tocante e posibilidad di mas tarifa Mericano riba articulonan di EU, e legislador top economico pa e zona europeo su di 4 economia mas grandi a bisa cu e ta kere cu EU te ainda kier mantene su lasonan economico cu Merca. “For di e banda di EU, nos ta constructivo pero no ingenuo,” Cuerpo a bisa, agregando cu e bloke lo persigui “otro rutanan den proteha nos firmanan y industrianan” si no por yega na ningun acuerdo cu e administracion di Trump.
Un pausa di 90 dia riba e tarifanan entre EU y Merca cu a anuncia lo caba dia 14 di juli. Mas o menos mita caminda den e periodo di gracia aki, e Presidente Mericano Donald Trump a anuncia 50% riba importacion di material. Merca tambe a implementa un 25% di tarifa riba vehiculonan y un 10% riba asina yama tarifa reciproco riba mayoria otro importacion.
Tocante con Spaña su problemanan tocante vivienda a yega aki, e minister a ripara un disminucion den construccion na Spaña despues di e crisis financiero den 2008 cual a hunga un rol grandi. Di mesun manera cu e crecemento di poblacion a causa di inmigracion, Cuerpo a bisa, y ta pone presion for di un aumento den cantidad di turista.
Mientras cu construccion di cas ta clave, e minister a boga pa un strategia all-of-the-above, incluyendo regula Spaña su mercado di cas y plataforma di huur pa termino corto.
