(AP) – Spaña a rechasa un proposicion di NATO pa gasta 5% di e GDP den necesidadnan di defensa cu mester anuncia proximo siman, bisando cu esaki no ta “rasonable.”
Prome Minister Pedro Sanchez, den un carta manda diahuebs na Secretario-General di NATO Mark Rutte, a bisa cu Spaña “no por compromete na metanan di gasto specifico pa loke ta trata GDP” na NATO su proximo cumbre na Den Haag.
Mayoria aliado na NATO ta na caminda pa promove Presidente Mericano su exigencia di inverti 5% di GDP riba nan necesidadnan di defensa y militar. Den comienso di juni, Suecia y Hulanda a bisa cu nan tin plan di cumpli cu e meta nobo aki.
Un oficial di NATO riba diahuebs a bisa cu dialogo entre e aliadonan ta andando tocante un plan di gasto den defensa nobo.
“Pa Spaña, compromete na un meta di 5% no solamente no ta rasonable, pero tambe no ta productivo, mirando cu esaki lo move Spaña leu for di su gasto optimal y lo stroba EU su esfuersonan andando pa fortalece su ecosistema di defensa y seguridad,” Sanchez a skirbi den e carta cu The Associated Press a mira.
Spaña tabatin e gasto mas abao den e aliansa militar den 32 nacion aña pasa, dirigiendo menos di 2% di su GDP riba gastonan di defensa.
Sanchez a bisa cu e pais ta “completamente comprometi cu NATO,” pero cumpli cu e meta di 5% “no ta compatible cu nos estado di bienestar y nos vision mundial.” El a bisa cu haci esaki lo rekeri corta servicionan publico y baha e gastonan, incluyendo den transicion berde.”
Na luga di esaki, Spaña lo mester gasta 2.1% di su GDP pa cumpli cu ehercito di Spaña su necesidadnan di defensa calcula, Sanchez a comenta.
Na cas, scandalnan di corupcion a impacta Sanchez su circulo cercano y miembronan di famai cu a pone e lider Spaño bao presion creciente pa yama eleccion trempan, te hasta di algun aliado. Den april, ora cu Sanchez a anuncia cu Spaña lo logra NATO su meta di gasto anterior di 2%, e decision aki a causa rabia na algun miembro di e coalicion cu ta ma iskierdista di su partido.
Aliadonan di NATO a acepta un meta di gasto di 2% di GDP riba gastonan militar despues cu Rusia a lansa su invasion di escala completo di Ucrania. Sinembargo e aliansa su plannan pa defende Europa y Norte America ta rekeri inversion di por lo menos 3%.
E meta awo ta di subi e porcentahe aki na 3.5 pa defensa clave manera tanki, avionnan, defensa aereo, misil y contrata trupanan extra. Un 1.5% adicional lo ser gasta riba cosnan manera cayanan, wafnan y veldnan aereo pa asina ehercito por desplega cu mas velocidad, ademas di prepara sociedad pa un posible atake.
Rutte ta den plan di trece dilanti un proposicion nobo riba diabierna cu e meta di satisface Spaña. E aliadonan Europeo y Canada ta spera por finalisa e acuerdo di gasto aki prome cu e cumbre, y no laga esaki habri pa cualkier debate intenso cu por alarga e reunion.
Polonia y e paisnan Baltico – Estonia, Latvia y Lithuania – ya caba publicamente a compromete na 5%, y Rutte a bisa cu mayoria aliado ta cla caba pa promove e meta aki.
Sinembargo Spaña no ta su so den NATO su miembronan cu ta gasta tiki. Belgica, Canada y Italia tambe lo encontra dificultad den gasta biyones di dollar.
Un pregunta grandi cu ainda mester contesta ta ki cuadro di tempo e paisnan lo ricibi pa por yega e meta di gasto nobo aki.
