Sparta Rotterdam y ASA lo ta anfitrion di un camp di futbol pa hoben cu lo tuma luga durante e prome siman di april. Esaki ta segun e relato cu nos a ricibi. Sparta Rotterdam ta un club di futbol profesional Hulandes cu tin su base na e ciudad di Rotterdam.
Algo cu ta hopi grandi y excitante ta cu Sparta lo ta mandando un delegacion di e Sparta Jeugdopleiding pa e camp hunto cu ASA. E Sparta Jeugdopleiding ta un school di futbol di 4 strea cu a yega di gana premio como miho school di futbol di Hulanda riba varios ocasion. Varios nomber grandi den futbol internacional a yega di gradua di e school di Sparta su jeaugdopleiding manera Danny Blind, Danny Koevermans, David Mendes da Silva, Ed de Goey, Winston Bogarde, Memphis Depay, Kevin Strootman, John de Wolf y JetroWillems di nos isla ruman Corsou ta djis algun di e nombernan cu por menciona. Hoofdcoach di ASA, coach David Appie Abdul, tambe a yega di hunga profesionalmente pa Sparta prome cu el a bin biba Aruba bek.
E camp no lo ta posibel sin apoyo di sponsornan cu ta aporta na nos hubentud manera Divi&Tamarijn AllInclusive, Arubianos, Wendy’s Aruba, Cooper Tires, Quinta del Carmen, doc Opleidingen y White Modern Cuisine. E Sparta ASA Soccer Camp cual lo tuma luga 2 – 6 April y ta costa Awg 250 pa cada mucha cual ta inclui participacion, fruta y cos di bebe, uniform completo di marca Robey cu logo di Sparta y ASA y un album digital como recuerdo di e camp. E prome 50 mucha pa inscribi y completa pago ta ricibi un bunita flip flop regalo di Arubiano. Pa mas informacion por tuma contact cu 592-5235, e-mail arubasocceracademy@gmail. com of check Facebook di ASA.
