Riba rednan social ayera a circula rumornan hopi impactante tocante Soca Monarch 2026, cual Soilo “Lord Lally” Sanchez a gana cu su cantica super popular, “The Lizard Kacking.”
Aparentemente durante control di e resultadonan a bin haya sa cu tabatin algo a bay malo cu conteo di voto, y a declara e ganador robes.
Diferente musico a duna nan opinion tocante e rumornan, y tin hopi interes pa mira ken ta e berdadero ganador. Entre nan, un persona cu a duna su opinion ta Ashrock Gario.
“E resultado di anochi final ta mustra mane cu e puntonan no a bay bon. Lo tin un meeting mas laat. Mi opinion ta whatever e resultado ta pa laga lord Lally cu su corona. We are ok with it.”
Mientras tanto, Lord Lally cu su banda Hot Ones a anuncia cu Lord Lally lo ta presente pa canta su cantica durante paradanan grandi, pa asina satisface comunidad di Aruba cu a mustra un aprecio enorme pa “The Lizard Kacking.”
Por recorda cu durante e rondanan inicial di e competencia di Soca Monarch, Lord Lally a ricibi un “Wild Card” pa avansa na e final despues cu comunidad a mustra su sosten inkebrantable pa e cantica mas popular di e temporada aki. Despues di a duna Lord Lally e Wild Card, a declar’e ganador di e competencia y Soca Monarch. Esaki a causa hopi agrado den comunidad, cu hopi elogiando y disfrutando e hecho cu e perseverancia di Lord Lally – kende tin decadas participando den Carnaval – a duna su fruto.
Ayera tardi pa 6.30, dirigentenan di banda a keda convoca pa un reunion urgente unda a discuti e situacion pa purba yega na un resolucion pa e situacion di problema cu conteo di voto.
Alrededor di 8or di anochi, musico Claudius Philips a informa na medio noticiero presente cu segun el a compronde, Stichting Musica no lo kita corona di Lord Lally. Sinembargo pa loke ta e puntuahenan, a indica cu lo sigui conta y lo dicidi despues kico lo dicidi.
Te ciere di edicion aki no a obtene mas informacion tocante e conteo nobo. Ta spera cu Stichting Musica lo duna informacion oficial despues di e reunion.
