Promenade (NP) (4).jpeg

Ayera mainta a tuma luga apertura di promenade, na San Nicolas, despues di varios siman cera pa trafico door di trabounan di renobacion. Bon Dia Aruba a entrevista un ex comerciante y trahado pa mira con nan ta haya e desaroyo aki.

 

Sr. Dorer tabata e doño  di e restaurant famoso Promenade na San Nicolas. E ya a retira, pero ta doño di e edificio cu pa hopi aña ta operando na San Nicolas, Antes como Acme store y Promenade. E restaurant aki awo tin e nomber O’neil’s Caribbean Kitchen ta awo di Sr. O’neil.

 

“Mi tabatin un soño basta tempo pasa unda cu mi ta mira San Nicolas ta bin na bida. Mirando esey ta tuma luga aworaki e ta haci mi hopi contento”, Sr. Dorer a bisa. El a agrega bisando cu pa e motibo aki e kier a gradici e minister cu a haci esaki posibel, den e caso aki Otmar Oduber, cu a haci cu e soño a bira realidad. “Mi ta desea mi ex chef O’Neil hopi exito, pa atende e luga e mesun manera cu ami a atende cun’e”.

 

A puntra Sr. Dorer ki e ta pensa di e desaroyo cu tin actualmente. Bon Dia Aruba tabata presente y particularmente dilanti di e restaurant en cuestion, tabatin diferente cos andando. E ta rondona cu e arte di diferente artista, stoelnan pafo y suficiente sombra pa esunnan cu bishita Promenade por sinta y relaha. E prome sentimento ta uno hopi relahante. Sr. Dorer a bisa cu e caya na bida atrobe y e ta simplemente bunita. E Arte particularmente ta duna e caya hopi bida y ta atrae hopi hoben, mescos cu e biento fresco cu ta pasa door di San Nicolas”.

 

E cuminda cu ta wordo ofreci na e restaurant cual por cierto ta un di e poco restaurantnan cu tin na San Nicolas ta consisti di un variedad di cuminda internacional, di region manera di Jamaica pero tambe local. “Nos ta multi cultural riba e isla aki y nos mester duna na tur nacionalidad, cultura y sabor”. El a agrega: “Caribbean cuisine with a touch of European”.

 

A puntra su persona pa loke ta e negoshi cu el a maneha pa tanto aña na San Nicolas y, si e tin mas negoshi rond di Aruba. Segun Sr. Dorer e mama di su casa tambe rond un negoshi na San Nicolas y ora nan a bira personanan di edad, el a puntra nan pa cuminsa cu un restaurant na San Nicolas. Asina el a evoluciona pasobra mi semper a kere den San Nicolas. E hendenan ta hendenan hopi amabel, no mucho orienta riba turismo y pues ainda tin e autenticidad di un isla den Caribe.

 

No mester bira mucho druk

Un conseho cu Sr. Dorer tin pa tur comerciante y particularmente e futuro comerciantenan cu kier bin establece na San Nicolas. “Ora cu e cartera ta yena mucho hopi, e ta bay over y San Nicolas ta djis wardando pa explota. Si e ta wordo maneha den e manera adecua y no overcrowded manera na Oranjestad. E lo ta un sitio bunita. San Nicolas y e comunidad tin solamente bon posibilidad awo en adelante, el a bisa

 

Empleado 26 aña San Nicolas

Sra. Jane ta di Artphoto unda cu e ta un empledo ya pa 26 aña. Ta bisa cu nan ta sumamente contento cu e caya a haya un lift, cual ta upgrade nan negoshi tambe. E ta sigui splica cu si turistanan bin ariba e lo ta hopi, hopi on, pasobra lo tin mas bida pariba. “Ami ta naci y lanta na San Nicolas, na añanan 1969 compara cu aworaki ‘69 tabata un blooming San Nicolas. Pues mi ta spera cu ta bayendo bek den e direccion ey.” A puntra Sra. Jane si e ta kere cu e vision di minister ta cuadra cu e filosofia di San Nicolas. El a bisa cu si, manera nan ta bisa na Hulandes,: ‘Beter iets dan niets’. Segun Sra. Jane e cosnan cu mas e gusta ta e bunitesa cu tin pafo, e parasolnan, e bankinan cu por sinta combersa social. Pasobra e hendenan di San Nicolas ta hendenan hopi amabel y cu hopi cariño, segun Sra. Jane. Algo cu e ta enfatisa riba dje cu ta un aspecto hopi importante cu ya no ta haya tur caminda mas rond di Aruba, Sin embargo na San Nicolas si tin e, el a termina bisando.