Diasabra anochi den Aruba Entertainment Center a tuma luga e competencia di baile cultural di Weganan Escolar 2023. Un anochi yen di baile, cultura y talento di e muchanan di diferente scol cu a prepara y a haci un bunita presentacion rindiendo homenahe na cultura di Aruba.
Durante e competencia diferente scol den diferente categoria a participa pa yega na prome luga. E prome categoria tabata esun di scolnan special, preparatorio y basico cu a enfoca ariba e presentacion dedica solamente na bailenan folklorico di Aruba.
Scol Paso Pa Futuro, unico scol special, a presenta un bunita baile di tumba di Aruba. Como unico scol special cu a participa, Paso pa Futuro a ricibi di biaha nan premio y medaya como ganadornan di e categoria aki.
Den e categoria di kleuterschool, Imelda Kleuterschool tabata e unico scol cu a participa den e categoria di baile cultural. E studiantenan di Imelda Kleuterschool a presenta un mix di diferente cancion cultural y a trece un ambiente cu a pone publico lanta y baila hunto cu nan. Como unico scol preparatorio den e categoria aki , e studiantenan a ricibi nan premio y medaya di biaha y a celebra nan bunita logro.
Scol Preparatorio Washington tambe tabata unico scol preparatorio cu a presenta den e categoria di baile ‘cheerleader’. Un categoria nobo y diferente na unda e chikitinnan a gosa durante nan presentacion ariba escenario.
Den e categoria di scol basico, un total di tres scol a competi pa e premio maximo, St. Dominicus College, Mon Plaisir School y Scol Xander Boagearts. Tur tres scol a haci un tremendo presentacion y competencia tabata fuerte. Na final e muchanan di St. Dominicus College a bay cu e premio maximo.
E siguiente categorianan tabata e competencia di baile di scol avansa na unda e hobennan a haya e oportunidad di participa cu bailenan moderno pero cu un toke di folklore. Un total di cuater scol a competi pa e premio maximo, Maria College Mavo, Colegio San Antonio, Abraham de Veer School y Colegio Arubano.
Competencia den e categoria di scol avansa tabata uno fuerte ya cu tur cuater scol a haci un tremendo presentacion y a trece diferente mensahe importante pa dilanti.
Colegio San Antonio a bay cu e premio despues di a trece di un manera impresionante e mensahe di salud mental pa dilanti. Un topico di suma importancia, sobre todo entre hobennan, y cu a yuda nan yega ne titulo di campeon den baile cultural.
Un categoria apart tabata e categoria di grupo multiescolar, den tanto categoria scol basico y scol avansa. Den e categoria aki, scol di baile Club di Movimiento, categoria di scol basico, y grupo di baile Kids & Youth in Action, categoria di scol avansa, a representa e diferente scolnan cu nan integrantenan ta atende y asina a uni forsa pa presenta nan baile den homenahe na cultura di Aruba.
Na final di anochi, a paga oficialmente e flambeu olimpico y asina a culmina tur actividad di Weganan Escolar 2023. Un pabien na tur ganador y participante.
