referendum aruparking.jpg

E 14 dianan cu ley di referendum ta exigi prome cu esaki tuma luga, unda aviso a sali publica den prensa, a wordo cumpli cabalmente,  y pronto trahadonan di Aruparking lo tin oportunidad di vota pa busca representacion sindical cerca STA.

 

Mediador di Gobierno, sr. Anselmo Pontilius a declara ayera na Bon Dia Aruba cu practicamente STA a haya luz berde pa bin cu e referendum aki ya cu nan a cumpli cu tur exigencia y reglanan di loke ta necesario. “Pa lo menos pa Aruparking tin un claridad total”, sr. Pontilius a bisa.

 

Entrante awe oficina di Mediador di Gobierno lo anuncia e fecha, ora y luga di e referendum di e trahadonan di Aruparking.

 

Na Aruparking un grupo di alrededor di 27 trahado tin derecho di voto, excluyendo e parti di gerencia. El a splica cu independientemente Aruparking ta un compania cu ta pertenece na Arubus, e tin su propio posicion huridico como un sociedad anonimo of NV, consecuentemente e trahadonan di e compania aki cu ta atende cu parkeer meter, no ta cay bou e condicion di trabou di e trahadonan di Arubus, sino cu mediante un contracto colectivo (CAO), nan lo purba di yega na nan mesun areglonan.

 

Dos referendum mas
 

Ta dos peticion di referendum cu oficina di mediador di Gobierno a atende for di sindicato STA. E di dos tin di haber cu trahadonan di departamento di produccion di e compania di utilidad WEB N.V. Tambe e solicitud aki a cumpli cu exigencia di ley di Referendum. Ayera tardi sr. Pontilius tabatin un reunion pendiente cu representantenan di sindicato STA pa wak e ultimo detayenan si nan ta cumpli cu e rekisitonan pidi pa ley.  Si esaki ta e caso tambe ta pendiente pa oficina di Mediador di Gobierno informa riba e fecha, luga y ora  demas particularidad di e referendum aki.

 

Un peticion nobo a drenta na oficina di Mediador di Gobierno pa un referendum na compania Forences y pronto nan lo bin cu e publicacion den prensa cu ta parti di e procedura normal e prome 14 dianan.