Despues di 51 aña cu sindicato Union Electricista Aruba (UEA) a representa e trahadonan di Elmar, diabierna ultimo e trahadonan a dicidi di cambia di sindicato y bay join cu STA.

Durante un referendum celebra na oficina di Mediador di gobierno mayoria di trahado a deposita su voto di confiansa pa sindicato STA. E sindicato su prome accion lo ta elimina un protocol cu ta ariba mesa y cu nan ta considera nada faborabel pa e trahadonan.

Mediador interino di gobierno, Marushka Tromp a declara na Bon Dia Aruba cu di 103 trahado cu a vota, 97 a vota na fabor di STA y seis a vota pa niun sindicato. Tabatin 117 trahado cu derecho di voto, kiermen esunnan cu ta cay den contracto colectivo (CAO). Elmar tin mas trahado pero nan ta den otro categoria cu no ta cay den e referendum di diabierna ultimo.

Sra. Tromp a señala cu e referendum a bay bon y den un forma constructivo. E trahadonan a bay haci uzo di nan derecho di voto di un manera ordena atendiendo cu e cooperacion cu Mediador di gobierno a haci na sindicato pa haci esaki.

STA no kier reorganisacion
Mientras cu representante di gerencia di Elmar a prefera di abstene su mes di duna comentario riba e resultado di e referendum aki, presidente di STA, Diego de Cuba a felicita e trahadonan cu a deposita nan confiansa riba nan sindicato. El a defini esaki como un trayecto bastante largo y hasta fastioso considerando cu ya caba tabatin e presencia di UEA.

El a señala cu e 97 voto na fabor di STA, e cantidad aki ta representa un poco mas di un 80% di e votonan di e trahadonan di Elmar. Esaki ta habri un capitulo nobo den e compania di utilidad Elmar. “E ta un reto bastante dificil mirando kico nos ta bay hereda for di sindicato anterior.” Aunke e ta dificil e no ta haya cu ta imposibel pa atende cu diferente asunto di interes di e trahadonan.

E tin cu bisa cu di parti di sindicato STA nan ta lamenta hopi ora cu nan ta tende cu sindicalistanan ta bay drumi den scochi di gerencia lubidando cu ta nan miembronan ta esun cu ta sostene nan. E ta haya cu e resultado di e referendum ta un forma caminda e trahadonan ta castiga e sindicato UEA.

E lider sindical ta premira cu esaki lo pasa den mas compania na Aruba pasobra ora bo ta sindicalista bo mester ta serio den bo negociacionnan y habri cu bo miembronan y no sconde cos. Y esaki e ta kere cu a sosode den e compania di Elmar pa falta di transparencia cu e trahadonan.

Protocol y reorganisacion
Na bispo di e referendum, STA a reuni cu e trahadonan unda ya caba nan a eligi e delegadonan. Nan ta mandando un carta of un e-mail pa notifica gerencia di Elmar riba e nomber di nan delegadonan. Tambe nan ta pidi un reunion di orientacion lo mas pronto posibel. Nan sa cu den Elmar tin problema cu un protocol cu a wordo firma; y cu STA kier aboli of no sigui cu ne. Sr. De Cuba ta spera cu hunto cu nan delegadonan nan lo por realisa un bon trabou.

Reorganisacion
Ademas directiva kier bin cu un ‘herinrichting’ cu STA ta haya cu e ta otro palabra uza ora cu nan kier bin cu un reorganisacion den e compania. Pa e sindicato esaki no ta aceptabel.

STA ta bisa cu nan ta mira esaki cu masha cautela ya cu den un reorganisacion tin cabes cu ta bay cay y e ta causa hopi dolor. Esey nan kier evita den e compania di Elmar ya cu no tin un fondo di garantia. Nan kier evita cu e compania ta cuminsa duna pakete pa retira trahadonan. Pa evita esaki STA ta bay traha duro riba e punto aki, ya cu nan ta wak cu Elmar ta un compania solido cu ta genera hopi placa. Pues e bolo mester wordo bon comparti, segun e sindicato. Nan ta mirando cu Elmar ta bayendo net den e direccion contrario ya cu nan ta purba corta caminda no tin mester.

Salario halto
A pesar cu ta wordo cuestiona cu e salario di e trahadonan di Elmar ta halto, e ta haya cu e salario aki mester ta un tiki mas halto y mas husto. E ta haya cu den utilidadnan tin ‘un fiesta chikito ta andando’, y sr. de Cuba ta kere cu e fiesta ey tin cu caba. Mester tene cuenta cu e situacion na Aruba caminda dia pa dia cu e prijs di comestibel y otro gastonan no ta baha sino cu nan ta subi, segun e.

Otro asunto tin di haber cu e fondo di pension cu ta debil, y nan kier atende e asunto aki debidamente. P’esey e prome cos cu nan kier elimina ta un protocol cu ta ariba mesa ya cu e no ta beneficioso pa e trahadonan.