(AFP)—Un ex-emisora Britanico di radio pirata a pidi disculpa diaranson “pa cualkier angustia causa” despues di accidentalmente anuncia e morto di Rey Charles III.
E anuncio eroneo a ser haci diamars atardi pa motibo di un eror di computer na su studio principal na Maldon den oost di Essex, Radio Caroline a bisa den un publicacion riba red social.
E eror a activa e asina yama procedemento pa morto di un monarca “cu tur stacion di Reino Uni tin cla mientras nan ta spera cu nan no mester us’e,” gerente di stacion Peter Moore a skirbi.
“Radio Caroline despues a keda den silencio manera tabata rekeri, cual a alerta nos pa restaura programacion y emiti un disculpa na aire,” el a bisa den un publicacion riba Facebook.
“Caroline tabata contento di transmiti e mensahe di Pasco di Su Mahestad e Reina y awor e Rey, y nos ta spera di haci esaki pa hopi aña ainda,” el a bisa, referiendo na e mensahe tradicional di Pasco di e monarca na e nacion.
“Nos ta pidi disculpa na HM (su mahestad) e rey y na nos oyentenan pa cualkier angustia causa,” Moore a agrega.
E incidente diamars a sucede mientras Charles y Reina Camilla tabata na Noord Irlanda, unda nan a participa den un presentacion cu un grupo folklorico Irlandes.
E publicacion no a bisa cuanto tempo a pasa prome cu e eror a ser descubri, pero agencia di noticia domestico Press Association a reporta cu diaranson atardi, ‘playback’ pa transmision di diamars entre 1:58 pm y 5:00 pm no tabata disponible riba website di e stacion.
Estableci na 1964 pa desafia monopolio di transmision di BBC, Radio Caroline anteriormente tabata opera for di barconan banda di costa Ingles.
Despues cu legislacion na 1967 a forsa hopi emisora pirata pa cera, el a continua intermitentemente prome cu termina transmisionnan na costa na 1990.
Caroline y otro stacion pirata similar a inspira e pelicula comico di 2009 “The Boat that Rocked” cu Bill Nighy y Philip Seymour Hoffman tocante un grupo di DJnan excentrico bibando y trahando hunto na lama.
