(AP)—Reino Uni lo reconoce un estado Palestino den september tanten cu Israel no acorda na un alto al fuego den Gaza, ta permiti UN trece cuminda den e teritorio y tuma otro medidanan pa un paz den largo plaso, segun prome minister Keir Starmer a bisa diamars.
Starmer, ken ta bao presion domestico creciente tocante e asunto aki mientras escena di hamber den Gaza ta hororisa hopi ciudadano Britanico, a convene un reunion di gabinete pa discuti e situacion eynan. Esaki a bin despues cu el a discuti e crisis cu presidente Mericano Donald Trump durante un reunion den Escocia dialuna.
Trump a conta reporteronan dialuna cu e no ta importa cu Starmer “ta tumando un posicion” riba estado di Palestina. Durante su biahe back pa Merca diamars, Trump a bisa cu e dos nunca a discuti Reino Uni posiblemente reconociendo un estado Palestino. “Nos no tin opinion riba esey,” Trump a bisa
Israel ta rechasa anuncio
Starmer a bisa cu Britania lo reconoce un estado di Palestino dilanti e Asamblea General di e Organisacion di Nacionnan Uni (UN), “tanten cu e gobierno Israeli no tuma medidanan substantivo pa caba cu e situacion perturbante den Gaza, acorda na un alto al fuego y compromete na un paz sostenible y duradero, rebibando e prospecto di un solucion di dos estado.
“Y esaki ta inclui permiti UN cuminsa suministro atrobe di ayudo, y haciendo e cla cu no lo tin anexacion den e West Bank,” el a bisa.
Ta parce hopi improbable cu e gobierno di prome minister Israeli Netanyahu por cumpli cu e condicionnan, cual ta trece daño na e asuntonan mas intratable den e conflicto. Netanyahu ta rechasa e solucion di dos estado riba base nacionalistico y di seguridad.
E ministerio di Asunto Exterior di Israel a bisa cu e ta rechasa e declaracion Britanico. “E cambio den e posicion di gobierno Britanico na e momento aki, despues di e decision Frances y presion politico interno, ta constitui e premio pa Hamas y ta trece daño na esfuersonan pa logra yega na un alto al fuego den Gaza y un framework pa e liberacion di rehen,” e ministerio a bisa riba X.
Starmer tambe a ripiti Reino Uni su demandanan pa Hamas libera tur rehen cu e tin deteni ainda, acorda na un alto al fuego, desarma y “acepta cu nan no lo hunga un rol den un gobierno di Gaza.”
Starmer a bisa den un declaracion televisa cu su gobierno lo evalua den september “con leu e partidonan a cumpli cu e stapnan aki” prome cu tuma un decision final riba reconocemento.
Britania a sostene pa hopi tempo e idea di un estado independiente Palestino existiendo hunto cu Israel, pero a bisa cu reconocemento mester ta parti di un solucion negocia di dos estado na e conflicto.
Pero Starmer a bisa cu Britania tabata dispuesto pa tuma stapnan pasobra “e idea di un solucion di dos estado ta reduciendo y ta sinti mas leu awe compara cu algun aña pasa.” El a bisa cu a pesar di e set di condicion cu el a pone, Britania ta kere cu “derecho di estado ta un derecho absoluto di e pueblo Palestino.”
Presion creciente riba Israel
Presion pa reconoce formalmente un estado Palestino a aumenta desde cu presidente Frances Emmanuel Macron a anuncia cu su pais lo bira e prome poder Occidental grandi pa reconoce un estado Palestino den september.
Manera Francia, e reconocemento di Britania lo ta mayormente simbolico, pero ta parti di un cambio Europeo y global contra Israel y por aumenta presion diplomatico pa un fin na e conflicto.
Mas cu 140 pais ta reconoce un estado Palestino, incluyendo decenas den Europa. Macron su anuncio siman pasa a haci Francia e prome pais den e bloc di G7—y esun mas grandi den Europa—pa tuma e stap ey.
Europa su actitud pa Israel a amarga pa via di Gaza. Paisnan incluyendo Irlandia, Spaña y Hulanda a busca pa pone presion riba Israel pa laga mas ayudo drenta y para cu operacionnan militar.
Mas cu 250 di e 650 legisladornan den e House of Commons a firma un carta urgiendo e gobierno Britanico pa reconoce un estado Palestino. Britania tin un rol particularmente historico como cu e ex-poder gobernante di loke tabata den pasado Palestina y autor di e Declaracion Balfour na 1917, cual a sostene e establecimento di un estado Hudiu.
Secretario di Asunto Exterior David Lammy a bisa cu Britania tin “un responsabilidad special.”
Nos apoyo pa Israel, su derecho pa existi, y e seguridad di su pueblo, ta firme,” Lammy a conta durante un reunion na UN na New York. “Sinembargo, e Declaracion Balfour a bin cu un promesa solemno cu nada por pasa, nada cu lo por perhudica e derechonan civil y religioso di e pueblo Palestino tambe. Y coleganan, esaki no a ser manteni, y e ta un inhusticia historico cual ta sigui tuma luga,”
Francia ta contento cu Britania su anuncio. “Reino Uni ta uniendo e momentum crea pa Francia pa e reconocemento di e estado di Palestina,” minister di Asunto Exterior Frances Jean-Noel Barrot a publica riba X.
Omar Awadallah, asistente pa e minister di Asunto Exterior di e Autoridad Palestino, a acepta Starmer su anuncio y a bisa cu Reino Uni tin un responsabilidad historico pa reconoce un estado Palestino y lo ta “corigiendo un inhusticia historico,” si e compromete na esaki den september. E Autoridad Palestino tin autonomia limite den algun parti di West Bank.
