Leyenda musical Stevie Wonder diamars a ricibi e Wolf Prize di Israel, encabesando un grupo di laureado den arte y ciencia ricibiendo e prestigioso reconocemento.
A reconoce Wonder pa ‘su tremendo contribucion na musica y sociedad enrikeciendo e bida di generacionnan henter di amantenan di musica’, segun un declaracion di oficina di presidente Reuven Rivlin.
Wolf Foundation ta un entidad propiedad di estado cu ta otorga e premio pa promove excelencia den ciencia y arte. Alrededor di tres dozijn di laureado Wolf a bay over pa gana premio Nobel.
Wonder, kende a ricibi mas di dos dozijn di premio Grammy, a produci un cantidad di hit durante su largo carera cu a cuminsa tempo cu e tabata un mucha cu tabata haci presentacion como Little Stevie Wonder. Su hitnan clasico ta inclui ‘You Are the Sunshine of My Life’, ‘Superstition’, ‘I Just Called to Say I Love You’ y ‘Living for the City’.
Wonder lo comparti e premio musical cu compositor Austriaco, Olga Neuwirth. “Cada un di nan por saca nos di e profundidadnan y eleva nos alma den un forma cu algun biaha nos no ta compronde completamente”, Rivlin a bisa, anunciando e premionan.
Giorgio Parisi a ricibi e premio pa fisica; Joan Steitz, Lynne Maquat y Adrian Krainer a gana e premio di medicina; y Leslie Leiserowitz y Meir Lahav a gana pa kimica.
Rivlin a bisa cu a selecta e laureadornan ‘pa nan logronan den nomber di humanidad’. El a describi e ganadonan di medicina como ‘investigadonan pionero di RNA, e mecanismo riba cual a basa vacuna di coronavirus’.
E premio ta otorga usualmente mas despues den e aña, den un ceremonia na e Knesset, parlamento di Israel. Pero pa motibo di e pandemia, lo duna e premio na e luga di residencia di e laureadonan.
