Mediante un conferencia di prensa, directiva di Stichting Avondonderwijs Aruba (SAA) a informa cu nan inscripcion a habri pa aña escolar 2023-2024 y cu esnan interesa mester cumpli cu tur rekisito cu ta exigi.

Natalie Geerman, ken ta fungi como director, a anuncia cu inscripcion ta habri for di dia 6 di juli pa esnan cu ta interesa di studia of cu den pasado a yega di cuminsa MAVO pero no a haya e oportunidad di caba cu nan estudio.

Avondmavo ta brinda diferente trayecto na unda e alumno por logra su Mavo-diploma banda di su trabao, famia y otro actividadnan.

E lesnan di Avondmavo ta tuma luga durante oranan di anochi di 6pm pa 10pm di dialuna pa diahuebs na Playa, San Nicolas of online. E trayecto online ta specialmente pa esnan cu tin dificultad pa ta presente fisicamente na scol. Esaki por ta entre otro, pa mamanan cu no tin hende pa yuda nan keda cas cu nan yiunan of hende cu tin limitacion fisico.

E inscripcion ta tuma luga online na unda esnan interesa por busca mas informacion riba nan website www.avondmavoaruba.com. Nan a destaca cu prome cu inscribi, nan ta conseha pa pasa door di e exigencianan pa por drenta Avondmavo cu ta riba e website aki pa por lesa loke ta necesario pa drenta Avondmavo.

Geerman tambe a señala cu pa esnan cu kier caba nan estudio den 2 aña en bes di 3, nan tin e Fast-Track traject. Esaki ta dirigi pa alumnonan cu motivacion halto cu ta dispuesto pa traha duro y logra e puntonan stipula pa por bula di aña 2 pa 3 despues di nan prome rapport.

Tambe nan ta brinda e posibilidad pa haci algun materia en bes di tur 6 of 7 den un solo biaha. Esaki ta specialmente pa alumnonan den aña 4 y ta brinda e oportunidad pa e alumno studia na su mesun liheresa.

Entre e retonan cu nan ta haya ta e presion financiero pa esnan cu kier studia ta hopi duro y pa combina e parti di trabao cu siñamento no ta facil. Nan tambe ta ripara cu e dunadonan di trabao no ta cooperando mucho cu e alumnonan, na unda Geerman a haci un apelacion “pa un biaha mas tur comerciante y negoshinan na Aruba, pa si acaso bo tin un alumno cu ta studiando, semper por puntra pa schedule, ki ora tin CP, nos ta coopera pa cu e banda ey tambe.”

Den e temporada di pandemia, nan a haya chens di experimenta hopi cu e parti di online y a base di esey nan a bin cu un trayecto pa esnan cu no por atende nan lesnan fisicamente na scol y awor esey ta bayendo hopi bon segun Geerman a expresa. “Esaki ta tuma hopi disciplina, si bo conoce bo mes y bo tin un tiki dificultad cu esey, e ora ey e trayecto ey no ta pa bo. Esey ta un trayecto pa hendenan cu tin hopi disciplina y cu ta hopi determina. Mayoria di biaha nos ta wak hendenan mas adulto cu por handle hopi bon,” el a sigura.

Esaki ta e prome aña despues di tres aña cu nan tin examennan diferente y door di esey tabatin un porcentahe mas halto di esnan cu ta gradua di loke nan ta custuma di wak. E aña aki ta bay ta menos compara cu otro añanan y nan ta bay back na e situacion di e añanan ey, pero nan no ta mal contento te aworaki cu loke nan ta bezig ta wak, segun Geerman a bisa.

Pa esnan cu ta interesa di cuminsa studia el a declara cu alumnonan cu ta scoge pa bay AvondMavo tin cu bay determina. “No ta facil pa tin biaha bo studia cuatro dia pa siman pa tres aña largo, kiermen e determinacion, boluntad y disciplina pa bo por logra mester t’ey,” el a comenta.

Tambe el a bisa cu loke nan tin cu haci ta siña pa haya bon punto, pa e cifranan por duna e alumno e caminda pa sigui.

Di su parti, Safiera Schippers ken ta fungi como agent director di Avondmavo Oranjestad, a señala cu algun biaha tin alumno cu no ta cumpli cu e rekisitonan pa por aplica pa Avondmavo y den esaki el a bisa cu tin posibilidad pa nan traha un instaptoets, cu ta bay tuma luga na maart di 2024.

Pa e motibo aki nan ta bay cuminsa for di november caba cu inscripcion, door cu nan kier prepara miho. “Avondmavo semper ta bezig cu innovacion y nos ta wak semper con nos por cambia y mehora.”

Unabes nan tin tur studiante cu a inscribi nan nomber y datonan, nan ta bay cuminsa prepara nan for di januari 2024 pa instaptoets, loke ta nifica cu nan ta bay haya extra les den Hulandes, rekenen, entre otro pa nan ta miho prepara pa traha e toets. “Nos ta wak cu tin diferente alumno cu pa hopi tempo nan no a bay scol mas y e ora ey nan a caba nan basisschool y nan no sa con pa sigui. Nos ta bay prepara nan den e partinan ey pa na final nos tin un miho resultado di e instaptoets di esun cu ta bay caba,” Schippers a señala.

Tambe a declara cu esun cu ta haal y ta logra cu e instaptoets, ta drenta cerca nan y nan ta haya un contract pa sigui.

Geerman a sigura cu tin hopi hoben cu ta interesa pa esaki, pero como Avondmavo nan tin nan rekisitonan na unda no tur hende por drenta, pa motibo cu e nivel ta basta halto y unabes e alumno ta inscribi e tambe tin cu caba cu su estudio. “Studiantenan cu ta drenta Avondmavo ta esnan cu pa un of otro motibo no a logra di caba nan estudio mainta, nan ta busca toch un manera pa sigui studia.” Geerman a bisa.

Esnan mas hoben, cu tin 16 aña, ta esnan cu tin mas interes di studia den esaki manera el a sigura.

Studiantenan tin hopi reto unda tur dia nan atende cu nan segun Geerman a sigura, pero nan ta duna nan un chens pa sigui.

Inscripcion ta tuma luga online via nan website y pa inscribi mester di e siguiente rekisitonan:

Papel di Censo (5 florin)

Copia di ID valido

Copia di ultimo rapport/lista di cifra/diploma

Prueba di pago di schoolgeld

Pa cualkier informacion por tuma contacto cu oficina di Avondmavo na telefon: 583-3779 of por pasa personalmente na oficina na Playa. Oficina ta habri di 8:00AM pa 4:30PM y ta situa na edificio di EPI.