Stichting Cas Cristelle (SCC) ta e prome cas di cuido cu a ricibi su permiso pa explota un cas di cuido cu firma pa minister di salubridad publico Danguillaume Oduber. Esaki ta un momento historico pa motibo cu te cu awo, e ta e prome cas di cuido cu ta cumpli cu e rekisito di permiso cu ta stipula den e ordenansa nacional di cas di cuido cu a drenta na vigor na 2017.
Despues di e dos rondnan di bishita di inspeccion na tur e casnan di cuido na Aruba den 2018, Inspectie Volksgezondheid a duna tur cas di cuido te cu 31 di juli 2019 pa regla nan permiso na Seccion Cuido di nos Grandinan na Departamento di Salud Publico (Despa). Na Seccion Cuido di nos Grandinan, e casnan di cuido ta wordo asisti cu, pa di manera acelera, haya bishita di control di Brandweer, DTI y seccion di higiena di salud publico. Ora cu e casnan di cuido pasa inspeccion di e instancianan menciona aki, nan lo ricibi aprobacion pa bin na remarca pa un permiso.
Inspeccion kier a subraya e importancia pa un cas di cuido tin un permiso pa motibo cu e control di Brandweer, DTI y seccion di Higiena ta pa sigura y mantene e siguridad pa ambos e grandinan den e cas y e empleadonan. Pesey a pone reglamento di un permiso como un prioridad y inspeccion kier a recorda tur e casnan di cuido pa regla nan permiso prome cu 1 di augustus 2019. Despues di e fecha aki, inspeccion lo tuma e medidanan necesario. Finalmente, Inspeccion di Salud Publico kier a felicita Stichting Cas Cristelle pa nan trabou y esfuerso pa regla nan permiso.
