Aruba Bank su Legacy Project di november ta yuda realisa otro proyecto pa comunidad
Den cuadro di su “Legacy Project”, Aruba Bank ta honra pa contribui cu un donacion di 100 mil florin na Stichting HUNTO, un fundacion cu ta dedica na yuda personanan cu ta enfrenta situacionnan di desamparo, adiccion y vulnerabilidad social.
E donacion ta destina pa e proyecto “Bemoeizorg Mobile Outreach Unit”, un iniciativa pionero cu ta trece cuido y speransa directamente na e hende cu ta biba riba caya. E bus movibel ta bay brinda servicio di “refresh”, un baño, atencion basico di salud, y orientacion social, cu un ekipo multidisciplinario di enfermera, trahado social y boluntarionan.
Edseline Leer, Head of Retail Banking di Aruba Bank, a bisa durante e entrega oficial:
“Aruba Bank ta kere cu cada persona merece dignidad y speransa. E proyecto di Stichting HUNTO ta mustra kico nos por logra ora cu nos traha hunto pa un comunidad mas fuerte y stabil. Nos ta orguyoso di yuda pa haci e proyecto “Bemoeizorg Mobile Outreach Unit” un realidad.”
E proyecto ta spera pa yuda mas cu 50 persona pa dia, duna nan e oportunidad pa un comienso nobo y integracion den sociedad.
Aruba Bank su “Legacy Project” ta enfoca riba tres pilar di responsabilidad social: comunidad, educacion y bienestar, cu e meta pa laga un legado duradero pa Aruba.
