Stichting Rancho ta celebra 16 aña di existencia como un fundacion comunitario cu durante mas di un decada y mey a traha consistentemente pa preserva, promove y fortalece e herencia cultural y natural di bario Rancho, Oranjestad y Aruba en general. Desde su fundacion, e organisacion a enfoca riba iniciativa cu ta conecta comunidad, historia, cultura y educacion, ainda den periodo cu circunstancianan externo a obliga adaptacion y reformulacion di plan y proyecto.

Durante un conferencia di prensa presidente di Stichting Rancho Clifford Rosa a splica cu e ultimo añanan a presenta reto significante, principalmente pa motibo di e pandemia, cu a tene impacto riba hopi actividad, evento y proyecto cu tabata planifica pa 2019 y cu a cuminsa na 2020. El a indica cu hopi di e iniciativanan ey a mester ser adapta of pospone, forsando e fundacion pa busca forma nobo di sigui operando y mantene su rol dentro di e comunidad. A pesar di e limitacionnan, Stichting Rancho a sigui identifica necesidad y oportunidadnan nobo, desaroyando proyectonan cu a mustra cu e interes comunitario pa conservacion cultural ta presente y vigente.

Un di e proyectonan cu a gana atencion ta e iniciativa Adopta un Hanchi, un concepto cu ta enfoca riba cuido y reconexion cu espacio publico y patrimonio local. Otro proyecto, Tempo pa Click, ta ofrece un perspectiva alternativo riba exposicionnan cultural, specialmente pa contenido cu normalmente no ta logra visibilidad amplio. Ademas, Hof’i Bario di Rancho ta representa otro iniciativa importante cu ta enfoca riba espacio berde y herencia natural dentro di e bario.

Segun Rosa, hopi di e proyectonan aki ta prepara pa drenta den un bachi nobo, awor cu actividad cultural y evento comunitario ta ser reactiva. E obhetivo principal ta pa conserva y reactiva parti di historia y cultura di Rancho, reconoci cu e herencia local ta forma parti integral di identidad cultural di Aruba.

Den e contexto aki, Stichting Rancho ta anuncia un actividad significativo pa dia 24 di januari, cu lo marca e inicio formal di un proceso di dialogo y reflexion historico y cultural. E evento lo tuma lugar na Biblioteca Nacional na San Nicolas y lo inclui un encuentro caminda diferente tema relevante lo ser trata. Entre e tema principalnan ta e conmemoracion di 200 aña di Oranjestad, un fecha historico, como tambe e 200 aña di relacion diplomatico entre Colombia y Reino Hulandes. Rosa a remarca cu aunke investigacion adicional ta necesario pa determina e posicion exacto di Aruba dentro di e celebracion diplomatico aki, e tema lo ser inclui den e agenda pa analisis y discusion.

Asunto diplomatico y constitucional tambe ta otro tema cu lo ser aborda, incluyendo topico cu tin relacion cu celebracion di 40 aña di Status Aparte. Den e mesun marco, Stichting Rancho lo presenta diferente proyecto cu a ser desaroya bou di e tema di conservacion di herencia cultural y natural, relaciona cu Aruba National Trust. Rosa a splica cu e fundacion ta miembro di International National Trust Organisation, un red internacional cu ta enfoca riba sistema di proteccion y conservacion di patrimonio cultural y natural. E miembresia aki ta crea espacio pa dialogo continuo riba manera Aruba por conserva e herencia di Rancho, Oranjestad y e isla en general.

Segun e vision di e fundacion, e proximo periodo ta dedica na expansion di conscientisacion y educacion riba herencia cultural y natural, dirigi na tur sector di e comunidad Arubano. E meta ta pa crea un comprension mas amplio di e balor di patrimonio tangible y intangible, y e responsabilidad comparti den su conservacion.

Como parti di e iniciativa nobo, Stichting Rancho tambe ta anuncia participacion den un proyecto internacional relaciona cu e 200 aña di relacion diplomatico. Rosa a enfatisa cu danki na apoyo financiero for di Hulanda, specificamente di Fonds for Cultuurparticipatie, e fundacion lo ta presente dia 28 di januari na Hulanda pa lansa oficialmente un proyecto nobo. E proyecto aki tin como obhetivo facilita acceso na fondo pa comunidad, permitiendo cu miembronan di comunidad por sigui eherce y mantene parti di nan herencia cultural intangible.

E iniciativa aki ta representa un colaboracion internacional entre cuatro organisacion, tres basa na Hulanda y Stichting Rancho como representante di Aruba y, den cierto grado, di e islanan di Caribe. Segun e Rosa, e colaboracion ta marca un paso importante den creacion di plataforma nobo pa conserva herencia y pa fomenta intercambio di conocemento den e region.

Ademas di e actividadnan di januari, Stichting Rancho tin planifica diferente evento durante e proximo lunanan. Dia 16 di februari, un evento lo enfoca riba conmemoracion di Segunda Guera Mundial, subrayando e impacto historico di e periodo ey riba Aruba.

Dia 18 di maart,tambe lo otro actividad cu lo tuma lugar como parti di un programa mas amplio di educacion y conmemoracion. Rosa a enfatisa cu e evento di 18 di maart lo marca un momento importante pa e bario di Rancho, cu e actividad di boto di miniatura organisa na un forma mas amplio cu edicionnan anterior.

Tradicionalmente, e evento a sirbi como un oportunidad pa duna operadornan di boto miniatura un momento pa practica nan herencia. Den e edicion di e aña aki, e careda lo ser dedica oficialmente na Le de Windt, un figura importante den e mundo di boto miniatura, un capitan conoci cu a aporta conocemento y experiencia durante hopi aña, tanto na Aruba como na otro islanan. E homenahe tin como proposito subraya e importancia di transferi conocemento artesanal na generacionnan nobo, pa asina garantisa continuacion di e tradicion di boto miniatura.

Conecta na esaki, e asociacion di boto miniatura lo ser reactiva, tumando su rol back den mantenemento, educacion y desaroyo di e tradicion. Stichting Rancho ta considera e paso aki como otro logro den su mision pa crea plataforma sostenible pa preservacion di diferente aspecto di herencia cultural.

Durante e mesun fecha di 18 di maart, atencion tambe lo ser duna na conmemoracion di 40 aña di Status Aparte. E fecha nacional aki ta reconoci como un momento clave den historia di Aruba, marcando autonomia politico y simbolonan nacional manera bandera, himno y escudo. Rosa a remarca cu Stichting Rancho ta considera e conmemoracion como un oportunidad pa reflexiona riba e desaroyo di identidad nacional desde Status Aparte te na actualidad.

Den luna di april, Stichting Rancho ta planea organisa un mini conferencia pa celebra Dia di Stichting Rancho. E fundacion a ser establece na 20 di april di 2010, un fecha cu e organisacion ta considera esencial pa inclui den e kalender anual di celebracionnan cultural di Aruba. E conferencia lo ser presenta den un formato creativo y educativo, cu lo tin como proposito principal pa educa e comunidad y profundis comprension di herencia cultural y natural.

Stichting Rancho lo clausura e prome kwartaal di aña 2026 dia 29 di april cu un tour cultural unico. E tour lo enfoca riba e relacion historico, cultural y diplomatico entre Aruba y e peninsula di La Guajira, incluyendo Riohacha. Despues di añanan di colaboracion cu e region ey, e fundacion ta anuncia oficialmente e tour cu tema “Ban back na Raiz”. Rosa a enfatisa cu e tema ta subraya e importancia di reconexion cu raiz cultural, specialmente considerando e cantidad significativo di descendientenan Guajiro cu ta biba na Aruba, y e relacionnan historico di comercio, cultura y diplomacia cu e peninsula.

Cu e programa amplio di actividad y proyecto, Stichting Rancho ta posiciona su mes como un actor clave den conservacion di herencia cultural historico y natural na Aruba, mirando pasado como un fundamento pa construccion di un futuro cu mas conscientisacion, participacion comunitario y respet pa identidad cultural.