Den fin di siman Stichting Santa’s Cause Aruba (SCA), un fundacion cu ta enfoca ariba cumpli e deseo di muchanan pa temporada di Pasco, a tene nan evento durante cual nan a cumpli cu e deseo di mas di mil mucha y a haci entrega di nan regalo pa temporada di fin di aña.
Stichting SCA a cuminsa na aña 2018 como un proyecto, di hobennan profesional y studiante, cu tabatin un deseo y a sinti un responsabilidad social pa duna muchanan entre 0 pa 18 aña di edad di menos recurso un regalo pa Pasco.
E prome aña e fundacion kier a duna minimo 100 mucha un regalo pa Pasco y a logra haci alrededor di 200 mucha feliz durante e prome aña. Desde e aña ey, cada aña e cantidad di mucha y hoben a crece te cu e aña aki e fundacion a logra yuda mas di mil mucha cu nan regalo di Pasco.
E idea cu e fundacion a bin cune ta pa padrino of madrina (godparents) cumpra regalo pa e mucha- y hobennan. Esaki por ta cualkier persona, scol y/of compania cu ta acerca e fundacion via nan pagina di Facebook of Instagram.
E godparents ta haya edad, sexo y lista di deseo di e mucha(nan) y nan lo hunga rol di Santa Clause y cumpra regalo den e criteria pa muchanan.
A traves di nan pagina oficial di Facebook e fundacion a publica cu despues di seis aña di existencia, na a logra surpasa e cantidad asombroso di mil mucha y/of hoben cu a ricibi nan regalo di Pasco.
E fundacion a organisa un actividad yen di alegria pa e muchanan cu a por a yega pa busca nan regalo, conoce Santa Clause y disfruta di un dia inolvidabel.
Por ultimo e fundacion a gradici tur persona cu a contribui pa haci e logro grandi aki posibel.
