Home Local Storing di turbina 6 a causa blackout

Storing di turbina 6 a causa blackout

171

Ayera full Aruba a keda sin coriente y tambe e presion di awa a keda afecta. Esaki a sosode mas o menos 9:35 di mainta caminda cu un interupcion den produccion di coriente na WEB.

Durante di un investigacion preliminar a mustra cu e storing a origina den central di WEB na turbina 6 cu na e momento ey tawata controla e frecuencia. En total a tarda ±6 ora pa yega 100% di suministracion di coriente, aunke varios bario a haya coriente dentro di un ora y mey caba. Esakita segun e comunicado cu nos a ricibi di WEB.

E proceso despues di un blackout ta tuma su tempo y mester wordo trata cu hopi cautela pa preveni mas disturbio. Ta cuminsa cu e generator di emergencia y sigui cu e motornan Recips cu ta bay relativamente lihe. Asina cu logra esakinan den servicio ta cuminsa suministra coriente na Elmar.

Pa loke ta e boilernan y turbina e proceso ta mas complica y ta tuma mas tempo pa logra stabilisa nan operacion. Unabes den operacion stabiel di e boilernan ta cuminsa pone turbinanan den servicio pa asina por sigui suministra coriente na Elmar. Pa mas o menos 3:45pm Aruba completo a keda suministra cu coriente bek. WEB ta disculpa pa e inconveniencia causa y ta gradici pueblo pa su comprension.

Aeropuerto

Mientras cu Aruba tabata tin un black out, aeropuerto a keda opera normal. E sistema di back up di emergencia a duna e coriente necesario. Tur pasahero cu mester a biaha y ta na aeropuerto pa un ora stipula a keda atendi normal. Asina cu e problema di suministro di coriente a wordo regla, tur cos a bolbe cana normal bek.