Studiante di afo: ‘Kico naturalisacion ta nifica pa Aruba?’

Nora Röders, studiante di ciencia politico y sociologia na University College Utrecht

Studiante Aleman na University College Utrecht, Nora Röders, pa caba su tesis ta puntra su mes ‘kico ta e nificacion di nacionalidad pa personanan cu ta naturalisa na Aruba?’. E studiante ta papiando cu personanan den comunidad pa haya sa si tin malcontento bou nan pa loke ta trata e institucionnan di naturalisacion na nos isla.

Sra. Röders den un entrevista cu Bon Dia ta elabora riba su estadia na Aruba pa investiga y haya sa mas tocante e motivacionnan di inmigrantenan cu bin nos pais tin pa naturalisa y bira ciudadano Arubano, pero tambe Hulandes.

Mescos nos a publica den nos edicion di ayera, e programa entre University College Utrecht (UCU) y Universidad di Aruba cu ta den su di 4 edicion ta enfoca riba trece estudionan academico na Hulanda mas cerca di comunidad di Aruba como rekisito pa por gradua cu un tesis.

Estudio na Alemania cu refugiadonan

Prome cu sra. Röders a cuminsa studia na Utrecht e tabata studia na su propio pais esta na Berlin, Alemania, unda el a enfoca riba refugiadonan specificamente riba tereno legal. E studiante a completa su stage na un abogado cu ta trata e materia di refugiadonan specificamente.

Pero no solamente riba aspecto teoretico e studiante a practica, si no cu a traha tambe na shelternan di emergencia unda tabata tuma refugiadonan y unda nan tabata keda pa mas largo. “Mi a traha di manera extenso cu personanan cu ta traha riba polisa di naturalisacion na mi pais, unda nos a haci e pregunta na ki momento un persona por bin na remarca pa bira ciudadano di e pais?”

Sra. Röders ta conta nos cu den e contexto Aleman unda tin hopi refugiadonan di Turkia a enfoca riba e grupo aki pa wak kico ta nan motivacion pa bira Aleman, pero tambe kico ta e bareranan cu ta stop nan di aplica pa naturalisacion.

Hopi persona kier naturalisa pasobra nan ta identifica cu e pais y sociedad’

Aunke a tira bista riba un populacion specifico na Alemania, e resultadonan di e investigacionnan cu sra. Röders a haci ta varia masha hopi mes, pues ta bira dificil pa bisa algo cu ta cubri tur e casonan. Sinembargo den e contexto socio cultural por a nota cu personanan cu tabata identifica mas cu Alemania tabata e grupo cu tabata mas dispuesto pa naturalisa, pero cu tambe tabata haya e oportunidad aki.

Mientrastanto personanan cu a experiencia hopi discriminacion tabata menos dispuesto pa naturalisa, segun sra. Röders ta conta nos di su investigacionnan. Pero segun e studiante e ta depende hopi riba cua ta e grupo social cu e posibel ciudadano tin rond di dje.

Pa hopi personanan e ta hopi importante pasobra nan ta biba henter nan bida na Alemania, of ya caba nan mayornan tambe tin tempo bibando na e pais. Tin hopi hende cu tin identidadnan unda cu nan ta berdaderamente sinti cu nan ta pertenece na sociedad, pero algo ta falta pasobra hende no ta acepta nan.”

Segun e studiante, e impacto cu naturalisacion tin riba hende su bidanan ta uno grandi y e ta reconoce cu ta un topico hopi delicado. “Hende tin hopi lasonan emocional na dje y mi ta kere cu gobernantenan no por simplemente impone algo sin tambe mustra cu bo por reforsa un relacion di confiansa cu hende por medio di mustra cu bo kier tende nan banda y traha hunto.”

Gradici di ta den contacto cu comunidad

Aunke pa sra. Röders e ta un reto pa haya e contexto di Aruba pa loke ta trata naturalisacion mirando cu e ta nobo na nos pais, e ta gradicido na cierto personanan cu ta yud’e haya contacto cu comunidad pa asina por amplia su research cu diferente punto di bista.

Mi ta purbando di ta hopi neutral pasobra mi ta realisa cu esaki ta un ambiente completamente diferente di loke mi ta custumbra, pero tambe pasobra e polisa di naturalisacion aki ta completamente diferente.”

No tin data riba motivacion pa persona establece na Aruba

Un punto cu sra. Röders a comparti ta cu tin hopi informacion riba motivacion pa personanan bin traha na Aruba, pues ora ta cuminsa biba aki, pero no tin data riba e motivacionnan cu personanan tin pa establece nan mes aki of bira ciudadano. Den e parti di naturalisacion a resalta cu un parti grandi no ta haya acceso pa naturalisa y cu no hopi persona ta logra pasa den proceso di naturalisacion cu exito.

Te awo e fase di investigacion ta andando den full swing pues no por conclui nada na momentonan actual, pero e studiante a comparti par di puntonan cu Bon Dia cu a hala su atencion.

Kico ta e nificacion di nacionalidad?’

Mi a wak cu na Aruba tin hopi hende cu ta aplica pa nacionalidad Hulandes, pero cu un grupito masha chikito, rond di un cuart di tur hende cu aplica ta hay’e. Pero tambe mi a mira cu tin hopi hende cu kier aplica, pero porta pa via di problemanan cu e institucionnan envolvi den e proceso pa nacionalidad nan no ta permiti pa aplica. Pa mi ta interesante pa haya sa: dicon cierto personanan no por aplica y dicon e ta asina dificil pa bo bira un ciudadano?”

P’esey sra. Röders tambe lo ta papiando cu e institucionnan cu ta envolvi den e proceso di nacionalidad na Aruba pa asina haya sa con nan ta mira e nocion di nacionalidad. “Pero ta importante tambe pa bay riba caya y papia cu hende cu ta haya nan mes afecta pa esaki. Mirando cu no ta comun den hopi pais pa ta tuma den consideracion e perspectiva di un persona cu ta pasando den e proceso.”

Di e manera aki sra. Röders lo kier contribui pa trece un polisa mas eficiente cu lo por sirbi e personanan cu ta wordo afecta pa esaki mes. Entre otro e studiante ta puntrando personanan den comunidad actualmente si nan a naturalisa, dicon a opta pa haci esaki y cua tabata e pensamento su tras. Pero tambe pa personanan cu no a aplica pa nacionalidad te awo, dicon nan ta opta pa no aplica of kico ta stop nan di aplica.

Nos combersacion cu sra. Röders a conclui di manera cu su entusiasmo ta habri pa tende storianan di personanan cu a, ta of te ainda no a pasa den un proceso di naturalisacion. “Mi kier tende tur banda di e storia mientras tempo ta permiti mi ta na e dushi isla di Aruba.” Pa esaki por tuma contacto cu sra. Röders via su email N.L.roeders@gmail.com

You May Also Like

26Charla.jpg

Hobennan di Aruba tumando iniciativa: ”Bo kier bay studia afo? Yega nos charla prome!”

Den combersacion cu Conrector di Examenklas di Colegio Arubano, Anne Cameron, Sra. Cameron ta ...

Leidsegracht106na (1).jpg

Cultura por crea beneficio economico

Minister Otmar Oduber conhuntamente cu su consehero Sra. Indra Zaandam a bishita Stadsherstel N.V. ...

detencion na turibana (4).jpg

Chauffeur bou influencia ta hera dal polis ariba quadracer na Turibana

Diadomingo anochi varios unidad di Noord y tambe di strand politie ta bay Turibana ...

parlamento amienda 1.jpg

Reunion Parlamento posponi atrobe: AVP no a presenta

No tin quorum pa e reunion publico di Codigo Civil, esaki kiermen cu no tin ...

caso labamento placa

Saconan di placa di labamento bashando fei zolder

Den 10 container di e compania local Arubras e placa, husticia ta kere un ...