Ayera atardi dia 4 di augustus a sali e grupo di studiantenan—conoci como e beursalen—rumbo pa Hulanda pa asina continua cu nan educacion halto. Ta conoci cu tur aña e Departamento di Enseñansa Aruba (DEA) ta organisa e biahe aki, y ta brinda e studiantenan guia y sosten durante e prome dianan di e transicion importante aki.

Ayera na Aeropuerto Reina Beatrix por a mira decenas di studiante cla ta para den rij cu nan sernan keri pa check-in pa nan vuelo. Normalmente, studiantenan cu ta bay Hulanda tin e cantidad mas grandi y pa e motibo ey semper a parti e biahe di tur studiante durante dos dia, usualmente fin di juli y comienso di augustus. Sinembargo, a nota riba e website di DEA cu e aña aki, e fecha di biahe ta pa un dia so. Segun informacion di DEA pa un otro medio di comunicacion, e aña aki a mira 184 studiante biahando pa Hulanda, di cual 107 tabata t’ey presente ayera y e otronan sea a bay caba of lo biaha riba nan mes den e proximo dianan.

Por a nota cu e aña aki tambe a mira menos studiante biahando pa Hulanda compara cu aña pasa, unda un total 218 studiante a biaha bay tera friu. Aunke no a logra verifica ainda e motibo exacto, e caida den studiante por tin di haber cu e situacion dificil di vivienda na Hulanda.

Manera Bon Dia Aruba a reporta aña pasa caba, Hulanda ta mirando un deficit den vivienda cu ta sigui crece, y esaki ta laga varios studiante di Caribe cu dificultad pa haya vivienda. E aña aki, e situacion no a mira mucho mehoracion. Aña pasa Bon Dia Aruba a acerca un vocero di DEA, ken a enfatisa cu un di e consehonan mas importante cu nan ta duna na e studiantenan cu kier bay studia na Hulanda ta pa inscribi trempan pa por haya un vivienda. El a indica cu desde cu e hoben cumpli 16 aña e por inscribi caba pa vivienda.

Mayoria studiante Rubiano ta studia den region di ‘randstad’, y atrobe e aña aki mayoria studiante (39) lo bay studia na Den Haag, sigui pa Eindhoven (23) y Utrecht (22). Estudionan mas scogi entre e studiantenan e aña aki ta Finance & Control – IFMC cu 14 studiante, HBO-ICT International Business cu 13 y Mechanical Engineering cu 6.

Na momento cu nan yega rond di merdia na Hulanda, e studiantenan lo ser ricibi pa e mentornan di e diferente stadnan. Di biaha despues di nan yegada nan ta ser parti den grupo dependiendo di e stad unda na ta bay studia y di eynan e mentornan ta sigui compaña nan te ora nan yega nan destino final. E dianan cu ta sigui despues di nan yegada, e mentornan ta guia y asisti e hobennan pa haci diligencianan importante necesario. Hunto cu e mentor, studiantenan tambe ta haya guia di miembronan di e Plaatselijke Opvang Commissie pa studiantenan Rubiano, conoci tambe como ‘POC-leden’. Esakinan ta mayormente studiantenan cu ya tin varios aña ta bibando na Hulanda y pues por duna conseho valioso na e studiantenan nobo. Riba e pagina di Facebook di Onderwijszaken Arubahuis, a splica cu e aña aki e POC-programma ta dura cuatro dia largo, den cual e studiantenan lo haya oportunidad pa regla inscripcion na censo, regla papelnan di lening cerca DUO, habri cuenta di banco, traha un DIGID, y conoce nan scol y e ciudad den cual nan ta bay biba.

Loke nan no mester preocupa cune mas ta e BSNnummer cu ta hopi importante pa contacto cu entre otro Departamento di Gobierno, manera seguro y salubridad. Tambe e studiantenan mester tin un BSNnummer pa por inscribi pa un camber como studiante y pa habri un cuenta di banco pa pidi un seguro. Den luna di maart 2024 ex-minister di Enseñansa, Endy Croes, a anuncia cu desde e aña aki studiantenan di Caribe lo ricibi nan BSNnummer prome cu nan biaha pa Hulanda. E proceso aki ta ser coordina y regla via Dienst Uitvoering Onderwijs (DUO) cu a prepara pa amplia su servicio desde aña 2024 pa por brinda e servicio adicional aki.

Esaki ta nifica cu desde aña 2024 en adelante, e studiantenan por aplica desde Aruba pa nan BSNnummer y asina por logra biaha cu nan BSNnummer den man, cual lo facilita nan ora nan yega Hulanda.