EdM CPI (2).jpg

E prijsnan den e categoria Vivienda a baha, segun nos Oficina Oficial di Estadistica (CBS) y pa motibo di esey e suma minimo pa un hogar consisti di dos adulto y dos mucho bou 14 aña a baha na september cu 40 florin compara cu e mesun luna na 2015.

 

Na september e suma minimo ey mester ta 4336 florin pa asina un famia por biba riba nivel social aceptabel. Otro informacion importante: e suma minimo pa un hogar di solamente un adulto tambe a baha cu 60 florin pa 2065 florin. E deficit (-386) entre e suma minimo aki compara cu e salario minimo tabata esun mas abou den 5 aña, segun CBS.

 

Prijsnan a subi

En general prijsnan a subi un poco luna pasa compara cu e luna anterior na augustus. E indice di prijs CPI pa september ta 117.35, loke ta representa un subida di 0.2%. Sinembargo e prome 9 luna di 2016 tin un caida di 0.9%.

 

E promedio anual di e tasa di inflacion pa e periodo di september 2015 te cu september 2016 ta -1.0%, un caida di 2.1 ppt compara cu e 1.1% registra den e periodo di september 2014 te cu september 2015.

 

Categorianan

Durante e luna aki, ocho (8) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Vivienda” (0.2%), “Cuminda y bebida no alcoholico” (0.4%) y “Transporte” (0.3%), causando un efecto di 0.06, 0.06 y 0.04 ppt, respectivamente. E subidanan den e restante sectornan a contribui cu un efecto di 0.06 ppt riba e CPI di september 2016. E subidanan aki a wordo contraresta parcialmente pa medio di principalmente caidanan den e indicenan di e sectornan di “Recreacion y cultura” (-0.5%) y “Paña y sapato” (-0.6%), cu a contribui cu un efecto di -0.04 y -0.03 ppt riba e CPI di augustus 2016, respectivamente. E caida den e sector restante a contribui cu un efecto di -0.01 ppt riba e CPI di september 2016.

 

Servicionan

Prijsnan di servicionan a conoce un caida di 0.4% y a causa un efecto di -0.13 ppt. E CPIC (core inflacion) – CPI excluyendo e efecto di energia y cuminda – a registra na september 2016 un subida di 0.8%, un caida di 0.3 ppt, compara cu e periodo corespondiente di aña pasa (1.1%). E indice di energia – cu ta consisti di e productonan: electricidad, awa, gasolin y diesel a registra un caida di 7.6%, cu ta 7.0 ppt mas abou compara cu e periodo corespondiente di aña pasa (-0.6%). E indice di cuminda a registra un caida di 0.8%, cu ta 4.5 ppt mas abou compara cu e periodo corespondiente di aña pasa (3.7%). E bestaansminimum pa un hogar consistiendo di dos (2) adulto y dos (2) mucha (edad 0-14 aña) na september 2016 ta Afl. 4,336, mientras cu pa un hogar di un (1) adulto e suma ta Afl. 2,065.

 

Combustibel

Prijs di utilidad (electricidad y awa), gasolin y diesel ta wordo determina primordialmente pa motibo di e prijs internacional di petroleo. Na september 2016 e prijs promedio pa bari di petroleo (US$ 45,31) a conoce un subida di US$ 0,77 (1.7%) compara cu augustus 2016 (US$ 44,54).

 

Brandstofclausule pa e uzo di electricidad te cu 500 kWh no a cambia na september 2016, y a keda Afl. 21,90 cen pa kWh. Brandstof clausule pa un uzo di cada kWh entre 501 – 1000 kWh no a cambia na september 2016, y a keda Afl. 27,80 cen pa kWh. Prijs di electricidad y di awa no a cambia compara cu augustus 2016. E prijs promedio di electricidad pa vivienda a keda Afl. 308,76 florin mientras cu e prijs promedio di awa pa vivienda a keda Afl. 137,05 florin.

 

Prijs di gasolin a subi na september 2016 cu Afl. 3,80 cen (2.3%) y a causa un efecto di 0.11 ppt riba e CPI. Prijs di diesel a registra un subida di Afl. 2,40 cen (1.8%) na september 2016 y a causa un efecto insignificante riba e CPI. Na september 2016, utilidad, gasolin y diesel como grupo, tawata tin un subida di prijs di 0.6% compara cu augustus 2016 y hunto a influencia e CPI cu 0.11 ppt, mientras cu e restante 448 bienes y servicio hunto a experencia un subida di prijs di 0.05% y tawata tin un efecto di 0.04 ppt riba e CPI.

LEAVE A REPLY

Please enter your comment!
Please enter your name here