Autoridadnan di Sur Korea a informa cu Pyongyang por ta preparando su di seis arma nuclear pa test despues di detecta actividad na un facilidad den Norte Korea. Eynan ta unda cu nan a conduci e cinco testnan anterior. Esun di mas reciente tabata september ultimo, un siman despues di training militar cu tabata tin entre Merca y Sur Korea, cual ta sosode tur aña. E tipo di training aki no ta cay den bon agrado na Norte Korea. Nan a skirbi un carta na consul di siguridad di Nacionnan Uni expresando nan frustracion y rabia.
Norte Korea ta actualmente observando cualkier movecion di Merca y ta enfatisa cu nan lo responde cu medidanan fuerte di defensa, como resultado di e ‘military drills’ cu Merca ta insisti ta solamente un training. Pero Norte Korea ta di opinion cu tur esaki ta preparacion pa un invasion.
Autoridadnan na Norte Korea a laga sa cu si mester bin un escalacion cu resultadonan catastrofico, Merca lo wordo poni completamente responsabel, cual ta un retorica cu Norte Korea semper ta subraya.
