Home Regional Surinam: Pirateria a bolbe na region di Caribe?

Surinam: Pirateria a bolbe na region di Caribe?

630

Mientras autoridadnan na Surinam ainda ta buscando victima y ta recuperando curpa despues di e atake mortal di siman pasa riba cuatro boto di piscado den awanan di Surinam, e aparente piratanan a ataca otro boto di piscado diaranson anochi y a mata por lo menos un piscado.

Den e prome atakenan ta trata di 16 piscado di cual no tin informacion completo ainda di nan situacion.

Di acuerdo cu Mark Lall, secretario di e Visserscollectief, un asociacion local di piscado, e capitan di e boto a ser mata, y tin incertidumbre encuanto e paradero di e otro miembronan di su tripulacion.

Varios boto di piscado, Warda Costa y otro entidad encarga cu mantene orden legal, a bay na e area cerca di canal Matapica, unda e atake mas reciente lo a tuma luga.
Mientras tanto, e curpa di e un di e victimanan di e atake di diabierna siman pasa a keda recupera diaranson pasa y hiba Paramaribo.

A pesar cu haya algun sobreviviente ainda ta birando menos probabel cu cada ora cu pasa, trahadonan di rescate a logra haya diahuebs pasa ainda un di e victimanan di e atake riba e botonan di siman pasa. E homber, cu segun informe tabata den estado critico, a ser hiba cu urgencia pa hospital. E lo a bisa e miembronan di e ekipo di rescate cu e atacantenan a bisa nan: “Nos a bin pa mata”, durante e atake.

Aparentemente tin cierto indicacion cu e ultimo atakenan no ta trata di acto di robo di criminal cu ta kita producto y otro cos valioso di e piscadonan ataca, sino cu por ta trata di un guera di teritorio entre piscadonan di Guyana y esunnan di Surinam, den awanan cerca di frontera. E atakenan ta parce di ta un venganza di un banda di entre 9 y 11 criminal dirigi pa dos ruman di Guyana, cu lo ta responsabel pa e atakenan reciente. Un di e ruman na ta biba na Guyana, mientras cu e otro ta residencia na Surinam.

Autoridadnan di Surinam a pasa e informacion tocante e diferente sospechosonan pa polis di Guyana pa trece e culpabelnan dilanti husticia.

(fuente: CaribbeanNewsNow)