Den un momento cu salud mental di hoben ta gana cada bes mas atencion, Fundacion Telefon pa Hubentud Aruba, bao direccion di su director James Sneek, a lansa un campaña di conscientisacion den colaboracion cu SV Dakota y otro partnernan. E iniciativa ta busca pa pone e tema di bienestar mental di mucha y hoben den centro di atencion, specialmente durante e luna di november, cu ta conoci internacionalmente como Luna di Derecho di Mucha.

Segun Sneek, e temporada di hubentud ta un epoca crucial pa formacion di personalidad y desaroyo di e mucha y hoben. “E ta un temporada di oportunidad, di crecemento y di desaroyo. Esaki ta pone tambe cu nos mucha y hobennan ta encontra nan mes cu diferente reto y durante e temporada aki algo sumamente importante ta e sosten cu nan ta ricibi for di e adultonan den comunidad di Aruba,” el a remarca.

El a enfatisa cu internacionalmente, estudionan ta mustra cu e salud mental di mucha y hoben ta bao presion. E situacion ta afecta tanto mucha muhe como mucha homber, pero segun e estadisticanan, hobennan masculino tin e tendencia di no busca ayudo ora nan ta sinti nan mes mentalmente malo.

Fundacion Telefon pa Hubentud, cu ya tin 26 aña di existencia, ta un pilar den comunidad Arubano ora ta trata di orientacion y sosten emocional pa hubentud. Sneek a enfatisa cu banda di e liña telefonico cu ta disponibel tur dia pa mucha y hobennan cu mester papia, e fundacion ta presente constantemente den scolnan, dunando charla, tayer y programanan di formacion riba tema manera norma y balor, comunicacion saludable y maneho di emocion.

Sneek a subraya cu cada luna nan tin un campaña diferente, segun e necesidad di e comunidad. Pa luna di november, nan ta poniendo enfoke riba salud mental en conexion cu Derechonan di Mucha, y e gesto di Dakota a duna un impulso grandi na e campaña.

Den un acto simbolico y historico, SV Dakota—un di e clubnan di futbol mas conoci na Aruba, funda na 1947—a dicidi pa cambia su colornan tradicional geel y preto durante full luna di november. Na lugar di e colornan habitual, tanto e division di honor como e categoria hubenil U20 lo ta hungando den color blauw, cual ta representa e derechonan di mucha segun e Tratado Internacional di Derecho di Mucha.

Gilmar Croes, presidente di SV Dakota, a splica cu e decision aki ta uno special. “E luna aki ta uno diferente, uno special. Nos ta sumamente contento di por forma parti di e proyecto pa conscientisacion di salud mental entre mucha y hobennan, tanto bao di mucha muhe y mucha homber. Pa prome biaha den nos historia nos ta cambiando nos colornan cu ta hancra den nos statutonan di SV Dakota cu ta geel y preto y lo ta hungando completamente den color blauw,” el a indica.

Presidente di Arubaanse Voetbal Bond (AVB), Randolf Koolman, tambe a expresa su felicidad cu e proyecto ta tumando forma. “E ta algo cu ta hopi necesario pa salud mental specialmente bao di hobennan. Nos ta contento cu SV Dakota a cambia su colornan geel y preto pa manda un mensahe importante.

El remarca cu ademas nan ta contento di a scoge SV Dakota pa lidera e mensahe aki mirando cu e ta un di e clubnan mas grandi y unda mas hoben ta participa.

Koolman a agrega cu e campaña ta cuadra cu e plan strategico di AVB pa e añanan binidero, cu ta duna mas enfoke no solamente na e parti fisico di deporte, sino tambe riba e parti social y mental. Esaki ta un forma pa AVB sigura cu futbol na Aruba ta un vehiculo di desaroyo humano completo.

El a splica cu pa basta aña caba AVB ta miembro di FIFA y FIFA semper a manda e mensahe cu futbol ta mas cu un wega. E colaboracion entre Telefon pa Hubentud, SV Dakota y AVB ta basa riba e mesun creencia: cu deporte tin un poder transformativo den bida di hobennan.

“Pa hopi di e muchanan aki e momento cu nan ta pasa riba veld, e training, e wega cu e coach y tur lider, pa hopi di nan ta algo cu ta yuda nan sigui bay dilanti,” el a enfatisa.

E campaña ta bay mas leu cu un simpel gesto deportivo, e ta un yamado pa comunidad completo pa tuma salud mental serio, specialmente den hubentud. Sneek a pone enfasis cu por preveni hopi situacion si habri e canalnan di comunicacion y duna espacio pa hobennan papia sin miedo.

Dakota, cu mas di 200 mucha y hoben cu ta forma parti di e club, ta un vehiculo poderoso pa manda e mensahe, y pa medio di e campaña aki e club ta inspira otro organisacionnan deportivo pa sigui e ehempel y pa uni forsa den promocion di bienestar mental y social.

E proyecto di conscientisacion pa november no ta un evento unico, sino e principio di un movemento mas amplio pa integra tema di salud mental den deporte y educacion. Tanto Telefon pa Hubentud como AVB y SV Dakota ta mira e necesidad pa sigui traha man den man. Nan meta ta pa cria un cultura den cual busca ayudo mental ta normal y accesibel pa tur mucha y hoben.

E campaña di Telefon pa Hubentud Aruba, SV Dakota y AVB ta un demostracion cu deporte y comunidad por uni man pa promove un futuro mas mentalmente saludable pa e hubentud. E cambio di color den uniform di Dakota ta mas cu simbolismo; ta un promesa cu Aruba ta traha pa un generacion cu ta papia abiertamente, cu ta busca sosten, y cu ta mentalmente fuerte.