Director di Banco di Seguro Social (SVb), Edwin Jacobs a informa cu diahuebs atardi e organo aki a transferi tur e sumanan pa empresanan cu a aplica pa e subsidio di salario (loon-subsidie).

El a bisa cu tur dunado di trabao registra na SVb te cu e fecha di 15 di maart 2020, nan por bin na remarca pa e programa di subsidio di salario. El a laga sa cu dunado di trabao cu a registra despues di e fecha menciona, y nan a pone cu forsa retroactivo, no lo aparece riba e lista aki. Esakinan a base di decreto ministerial.

Igualmente nan a haci un clasificacion di e dunadonan di trabao. E clasificacion a wordo haci pa dunadonan di trabao cu tabata vulnerabel pa efecto di medidanan tuma den cuadro di e crisis di Covid-19. Otro clasificacion tin di haci cu e dunadonan di trabao cu ta wordo premira cu nan sufri un perdida di minimo di un 25% di entrada. Nan ta e dos criterio basico –segun director di SVb– den e prome proceso di otorgamento di subsidio di salario.

A base di e criterio aki y despues cu a wordo otorga e subsidio di salario, SVb ta para den e situacion actual cu tin tres grupo di dunado di trabao: E prome tin di haci cu e dunado di trabao cu no a bin na remarca pa motibo cu nan no a wordo clasifica cu nan a sufri pa efectonan di e Covid-19. Of cu nan no a premira cu nan lo sufri un perdida di mas cu 25%.

Otro situacion tin di haci cu e dunado di trabao cu si a pasa e seleccion di criteria, pero nan no a aplica pa e subsidio di salario. E ultimo ta relaciona cu e dunadonan di trabao cu a clasifica cu e criterianan, y cu nan a aplica tambe pa e subsidio di salario.

Solicitud di obhecion.
Jacobs a laga sa cu pa e grupo di dunadonan di trabao cu no a bin na remarca pa e subsidio di salario den e prome ronda di seleccion, ya sea cu nan no a pasa e prueba di ta vulnerabel. Of cu nan a sufri un perdida di mas cu 25%. Nan lo ricibi un carta di SVb riba e decision pa kico nan no a bin na remarca pa e subsidio di trabao.

Den e caso aki e dunado di trabao tin 6 siman pa entrega su obhecion. Pa canalisa esaki SVb a crea un E-mail adres: bezwaarloonsubsidie@svbaruba.org

E dunadonan di trabao lo por substancia nan potencia pa kico si nan ta kere cu por bin na remarca pa e loon-subsidie. Director di AZV a bisa cu tin un comision di evaluacion cu a keda instala di personanan cu ta bin for di SVb, departamento di Asunto Economico y departamento di Impuesto, y nan ta encarga pa reevalua cada caso di apelacion riba subsidio di salario, y nan ta conseha e director di SVb. Si e conseho ta positivo, y director di SVb ta tuma e conseho aki, e dunado di trabao aki lo ricibi e oportunidad pa ainda aplica pa e tipo di ayudo aki.