SVB: ‘Lo intensiva controlnan na pia di trabao y pafo di oranan di trabao pa empleadonan no registra’

Director di SVB, Sr. Edwin Jacobs a trece pa dilanti e cifranan di cantidad di empleadonan registra na SVB y ta informa cu lo tin control pa loke ta trata empleadonan cu no ta registra na SVB, e controlnan aki lo bay bira mas intensivo e simannan nos dilanti.

Segun Sr. Jacobs, observando e situacion di e prome mita di aña compara cu awor, ta mira cu cantidad di trahado registra cerca SVB a aumenta cu 922, e cantidad di cuponan di trabao registra a aumenta cu 1338, anto a bin 78 dunado di trabao nobo durante 2022 na SVB. Si compara cu Februari 2020, e luna prome cu e pandemia a dal, SVB ta 3.2% bao e cantidad di trahadonan registra e momento ey. SVB ta calcula cu na e momento akinan tin un cierto cantidad di trahado cu no ta registra na SVB y p’esey lo intensiva den lunanan di Augustus bay dilanti ora cu vakantie di scol pasa, lo intensifica controlnan na pia di trabao y pafo di oranan di trabao. Specificamente den sectornan conoci pa SVB cu ta emplea trahado cu no ta registra. Esakinan ta sector di construccion, sector di horeca y sector di seguridad.

Ta recomenda tur dunado di trabao pa evita nan mes un dolor di cabes y evita multanan cu ta substancial, pa bay online y inscribi trahadonan anto cumpli cu ley. Esey ta un di e condicionnan importante cu SVB tin pa ley di seguro di malesa y accidente. Mester ta consciente cu na momento bo ta traha, algo por pasa na pia di trabao of tambe door di intercambia cu diferente persona – mirando cu nos ta un comunidad habri pa mundo henter – malesanan tambe ta presenta nan mes. Ta pone e ora como resultado cu pa motibo di malesa of accidente di trabao bo no por traha y bo tin cu sigui haya bo salario. P’esey SVB ta ofrece seguro di malesa y seguro di accidente: Na momento cu bo ta AO pa motibo di malesa, despues di 3 dia bo ta haya derecho pa haya compensacion for di fondo di malesa. Na momento bo haya bo mes den accident di trabao, desde prome dia 100% compensacion di bo salario ta sigura na SVB. P’esey segun Sr. Jacobs, ta importante pa na momento bo drenta servicio como trahado bo puntra dunado di trabao si bo ta registra na SVB.