Ayera Stichting Verstandelijk Gehandicapten Aruba (SVGA) a tene nan celebracion di carnaval. Bon Dia Aruba a combersa cu Sra. Elvira Tromp, cabesante di Centro Man na Obra, un di e departamentonan di fundacion, ken a splica un poco mas tocante e celebracion y e fundacion.

“Despues di dos aña nos di SVGA ta hopi contento cu nos por celebra carnaval back cu tur e departamentonan di nos fundacion. Danki na cooperacion di general manager di Renaissance Wind Creek Casino, cu ta colabora pa hopi aña caba cu nos di SVGA, pa por celebra carnaval den Renaissance Convention Center,” Tromp a indica.

Pa SVGA e ta un tradicion caba pa celebra carnaval y nan tin mas di 20 aña caba ta celebra carnaval den Renaissance Convention Center. El a splica cu e clientenan mes ta puntra ora cu ta temporada di carnaval si nan ta bay tin nan fiesta di celebracion.

Durante e ultimo dos aña, obviamente pa motibo di e pandemia di COVID-19, e fundacion tampoco por a celebra carnaval manera ta custumber, pero ayera finalmente tur e cliente- y trahadonan di SVGA a celebra hunto. “Nos ta contento cu nos tur ta hunto aki den pa celebra Aruba su dushi carnaval 69,” Tromp a expresa.

Den añanan anterior, Trump a indica, berdad diferente di nan clientenan ta participa den e paradanan di carnaval, tin biaha cu e fundacion mes of tin biaha riba invitacion di otro instancianan. Nan tin clientenan tambe cu aki aya, individualmente e mayornan mes ta involucra nan den e parada. Pero como instancia, como fundacion e aña aki nan no ta participa den e paradanan. “Cu poder di Dios añanan cu ta bin nos por bolbe stimula nan pa e participacion,” el a agrega.

Tromp a sigui splica cu pandemia a afecta e fundacion y nan clientenan tambe y esaki a haci cu cu mayoria di e clientenan no por a asisti full-time y tabata asisti apenas un par di dia pa siman na e fundacion.

Pa motibo di esaki e fundacion mester a adapta su programanan, tur hende mester a custuma di tene distancia social, bisti tapa boca etc. Aworaki cu finalmente tur cos ta back na normalidad, Tromp ta enfatisa nan ta hopi contento, pero sin lubida di tuma e precaucionnan necesario ainda.

Pa loke ta e expectativanan di e fundacion e aña aki, Tromp a remarca cu como fundacion nan kier wak inclusion di nan hendenan den comunidad di Aruba. “No lubida nan pasobra nan tin un deficiencia, nan tambe ta parti di nos comunidad. Unda cu por involucra nan, invita nan, laga nan participa conhuntamente cu henter e pueblo di Aruba,” el a subraya.

Stichting Verstandelijk Gehandicapten Aruba a wordo funda oficialmente dia 9 di december 1964 bao e nomber ‘Stichting ter behartiging van de belangen van het gehandicapte kind’. E mision di SVGA ta pa cuida, guia y siña e personanan cu limitacion intelectual pa nan por desaroya nan mes den personanan independiente, segun nan propio capacidad.

E obhetivo ta pa brinda cuido y enseñansa di calidad halto na e personanan cu limitacion intelectual pa nan logra un bida di mihor calidad den comunidad, na unda mayornan/esnan cu ta cuida y/of esnan responsabel, clientenan y profesionalnan ta traha hunto

SVGA tin diferente departamento, e ta consisti di Scol Duna un Man cu ta un basisschool, unda

cu e muchanan ta keda te cu 16 aña. E Departamento Bibito Pin cu ta un pasa dia pa mucha cu ta

cuminsa y ta tuma muchanan di 2 aña y nan ta keda te cu 16 aña, y dependiendo di e desaroyo di e muchanan nan ta evalua unda e mucha lo bay despues, e por ta scol of un di e otro

departamentonan.

Briyo di Solo ta un pasa dia pa adulto cu ta di 16 aña bay ariba y hoben- y adultonan ta keda den e departamento te ora cu nan por participa cu e meta di e departamento. Mesun cos ta conta pa Centro Man na Obra, nan ta tuma e muchanan cu 16 aña y nan ta keda na e centro tanten cu nan por participa cu e meta cu e centro tin.