Recientemente, Stichting End Child Abuse (SECA) a publica un alerta a traves di nan pagina di Facebook “Ta Basta” tocante un caso di un individuo, presunto pedofiel, cu segun acusacion ta usa Snapchat pa acerca menornan di edad cu intencionnan sexual. Segun e organisacion, e informacion comparti a conduci na identificacion di e sospechoso cu a ser reporta na autoridadnan competente.
E caso, cu durante e ultimo dianan a genera preocupacion y indignacion den comunidad, a sali na cla despues cu un menor di edad a informa su mayornan cu un usuario den Snapchat tabata tuma contacto cune regularmente y haci pregunta cu nan a considera straño y inapropia.
Segun informacion comparti pa e organisacion, e mayornan a nota cu e combersacionnan no tabata limita na contacto amistoso, pero a mira cu e preguntanan tabata tuma un contexto cada bes mas personal y sexual. Esaki a causa alarma entre e famia, cu inmediatamente a cuminsa investiga kico exactamente tabata pasando.
Den un intento pa proteha e menor y identifica ken tabata tras di e cuenta di Snapchat, e mayornan a sigui e comunicacion y tabata fingi cu tabata e menor tabata comunicando cu e persona. Durante e intercambio di mensahe, segun potretnan cu Ta Basta a publica hunto cu e texto di alerta, e sospechoso lo a ofrece e menor placa, a comparti contenido explicito y a busca forma pa reuni cu e menor sin conocemento di su mayornan.
E evidencia recopila a trece preocupacion serio, particularmente pasobra e comportamento describi den e mensahenan ta cuadra cu patronchinan frecuentemente observa den caso di “grooming” online, e practica unda un adulto ta busca gana confiansa di un menor cu intencion di explotacion sexual.
Segun e organisacion, e mayornan a haci denuncia na autoridadnan competente y tambe a busca apoyo di Ta Basta pa alerta comunidad y evita cu otro menor di edad por cay den un situacion similar.
Segun informacion publica pa Ta Basta, ni dos ora despues cu e caso a ser comparti riba nan red social, e organisacion a ricibi e prome mensahe cu informacion tocante identidad di e presunto pedofiel. Poco despues, mas mensahe a drenta. Dentro di menos di un ora adicional, diferente persona, segun Ta Basta, a comparti mesun informacion puntando riba e mesun persona.
E organisacion a reporta cu nan a ricibi dies mensahe y cuatro yamada cu informacion consistente. Nan a indica cu e datonan ricibi a permiti nan determina ken ta presuntamente e persona tras di e cuenta Snapchat menciona den e denuncia.
“Tur informacion ta indica mesun persona. Nos tin indicacion di ken e ta, unda e ta biba, unda e ta traha y unda e ta frecuenta,” Ta Basta a comunica den nan publicacion a tocante e caso.
Tur e material recopila, incluyendo evidencia digital, potret, video y otro dato disponible, a ser entrega na autoridadnan pa investigacion.
Segun Ta Basta a indica, e presunto pedofiel ta un persona cu anteriormente ya a keda deteni relaciona cu presunto delito sexual contra menor di edad.
E caso a causa un ola di reaccion den comunidad cu dificilmente por ser ignora.
Den centenares di reaccion y comentario comparti, hopi residente a expresa frustracion cu loke nan considera falta di rapidez den maneho di caso cu ta involucra seguridad di muchanan. Varios comentario a cuestiona con ta posible cu un denuncia di naturalesa asina serio por keda sin contesta inmediato, mientras otro a expresa preocupacion cu cualkier retraso por permiti cu otro menor di edad por bira victima di e presunto pedofiel aki.
Un comentario a cuestiona con investigacion tocante menornan no semper ta haya prioridad urgente, specialmente den casonan unda evidencia digital ta disponible. Otro ciudadano a expresa preocupacion cu personanan sospecha di delito sexual por usa cualkier tardansa pa cambia nan ubicacion, elimina evidencia of busca contacto cu otro menor.
E caso tambe a rebiba un debate cu Aruba conoce pa añas tocante efectividad di castigo imponi na hende condena pa delito sexual contra menor di edad. Varios residente a argumenta cu ripiticion den caso similar ta mustra cu ley actual no ta produci suficiente efecto preventivo.
Otro comentario a propone creacion di un registro publico di delincuente sexual, similar na sistema cu ta existi na paisnan manera Merca y algun otro hurisdiccion internacional. Segun defensornan di e idea, un registro asina por yuda mayornan y comunidad identifica riesgo potencial.
Otro tema cu a surgi ripitidamente den e reaccionnan ta e uso di plataforma digital door di menornan. Algun residente a menciona no solamente Snapchat, sino tambe otro plataforma popular entre mucha, entre otro e wega popular Roblox y diferente aplicacion di wega y mensahe.
Expertonan internacional den seguridad online a adverti regularmente cu plataformanan digital popular entre hoben frecuentemente ta ser usa door di depredadornan sexual pa acerca victima potencial. Den hopi caso, e contacto inicialmente ta presenta manera un amistad normal, pero gradualmente ta evoluciona den combersacionnan mas personal y eventualmente sexual.
Netamente pa e motibo ey, expertonan ta enfatisa e importancia di supervisa actividad digital di mucha y hoben sin necesariamente invadi nan privacidad completamente. Comunicacion habri entre mayor y yiu ta ser considera un di e hermentnan mas efectivo pa detecta señal di peliger trempan.
Ta Basta a enfatisa cu e rapidez cu cual comunidad a reacciona den e caso aki a mustra cu ciudadanonan ta dispuesto pa coopera ora seguridad di mucha ta na peliger. E organisacion a expresa gratitud na tur persona cu a comparti informacion despues di e publicacion inicial.
Na mesun momento, Ta Basta a reconoce cu tin limitacionnan legal cu mester respeta durante investigacionnan di e tipo aki. E organisacion a splica cu den pasado, exposicion publico di presunto sospechosonan di pedofilia prome cu e conclusion di un proceso hudicial a crea complicacionnan legal durante e caso penal. Pa e motibo ey, nan a expresa cu nan ta purba logra un balans entre alerta publico y respet pa e proceso legal.
Mientras tanto, e caso lo continua den man di autoridadnan competente.
E caso aki ta sirbi como un recordatorio importante pa tur mayor na Aruba. Den un tempo unda muchanan ta pasa gran parti di nan dia conecta na rednan social y otro plataforma online, supervision y comunicacion habri entre mayor y yiu ta mas importante cu nunca.
Expertonan ta recomenda pa mayornan conoce ki aplicacionnan nan yiu ta usa, revisa regularmente ahuste di privacidad y controla lista di contacto den e telefon di e yiu, y combersa cu nan tocante e peligernan cu nan por encontra online. Reconoce señalnan sospechoso na tempo y mantene un relacion di confiansa cu e mucha y hoben, na e punto cu nan no tin miedo pa comparti cualkier experiencia incomodo, por haci e diferencia entre preveni un situacion peligroso of bira victima di abuso. Proteccion di e mucha y hoben den era digital ta un responsabilidad comparti cu ta cuminsa na cas.
