Januari ultimo tabata un luna di hopi reto y preocupacion na Aruba pa loke ta trata e pandemia di Covid cu e presencia di e variante Ingles. Tambe cu e cifra lamentabel di 10 morto victima di e virus aki.
Minister Presidente, Evelyn Wever-Croes a laga sa cu aunke nos ta habri luna di februari mas trankilisa, e virus t’ey y nos mester sigui cuida. Den todo caso te ora cu nan por vacuna gran parti di nos comunidad. Igualmente el a bisa cu niun hende lo wordo obliga pa tuma e vacuna, pero si esunnan cu ta cay den grupo di riesgo ta wordo conseha pa tum’e. E mes a consulta cu su dokter di cas kende a recomend’e pa tuma e vacuna, ya cu si e ta haya e Covid, e chens pa bira hopi malo di dje no ta grandi.
Medidanan y variante Ingles
Tambe el a informa cu e reglanan mas stricto di orden publico cu a wordo aplica te final di januari, entre otro toque de queda, a keda extende por lo menos pa un siman mas.
E prolongacion of no di e reglanan aki ta depende di e desaroyo di e virus, y esun di su variante Ingles detecta den nos pais. Ayera dialuna nan tabata na spera di e resultado di Hulanda pa gobierno tin un miho bista riba e variante aki.
Nan lo sigui monitor e situacion aki di cerca y si tin cambio den nan maneho y medidanan, gobierno lo informa inmediatamente. Den transcurso di siman nos lo sa mas, pero si e prome mandatario no ta descarta cu si e variante Ingles di e Covid ta sigui presente di un forma alarmante na Aruba, nan lo fortalece e medidanan di orden publico, entre otro pa ta menos den cercania cu otro. No ricibi bishita na cas y no fiesta sin niun excepcion, pasobra e variante di e Covid aki ta hopi contagioso.
E di tres ola di e virus na Aruba cu nos ta aden keto bay, a trece mas costo financiero adicional, entre nan di personal pa haci e trabao. El a elogia e trabao di nos frontliners tanto riba tereno di cuido y tambe di ordo publico pa asina por a logra mantene e plamamento di e virus.
