Segun un articulo den medio di comunicacion Infodefensa, cu ta cubri noticianan di region Latino America y Caribe, presidente Venezolano, Nicolas Maduro, a duna orden pa Forsa Arma Nacional establece basenan militar nobo den e peninsula di Paraguana, pa aumenta e capacidad di “vigilancia” y “reaccion arma.” El a haci esaki durante e acto conmemorativo di e di 17 aniversario di Ceofanb (Comando Strategico Operacional di Forsa Arma Nacional).

“Ya mi a duna orden secreto pa establecemento di basenan militar den e zona, basenan militar nobo. Nobo den concepto, no un base militar tradicional. Nobo den concepto, den su integracion cu e poblacion, den ocupacion teritorial, den capacidad di vigilancia, den capacidad di reaccion arma,” Maduro a bisa.

Di mesun manera, el a bisa cu e basenan militar ta bay opera te na e Cabo San Roman, bao di un plan di ocupacion teritorial y desplieuge di reaccion arma den contexto di e maniobranan di expulsion di e gruponan narcotraficante arma cu ta opera eynan, segun e relato.

Loke a hala atencion pa nos isla, ta cu e presidente Venezolano a reitera “e yamado na gobierno di [Reino Hulandes], na e gobiernonan di Aruba, Corsou, y Bonaire, e coordinacion necesario pa combati e rutanan di e Tancol (Terorista Narcotraficante Colombiano) den e zonanan maritimo ey,” y a finalisa bisando cu “nos a haci nos parti hopi bon. Ban sigura e espacionan comun.”

Debi na e situacion special cu Venezuela ta atravesando, e relacion entre Reino Hulandes y Venezuela ta practicamente suspendi, mientras cu na mes momento, pa decision di presidente Maduro, e frontera maritimo y aereo cu e parti Caribense di Reino ta cera desde 2019. Mas recientemente, Reino Hulandes a cambia su conseho di biahe pa Venezuela na nivel cora, cu ta nifica cu ta recomenda pa no biaha pa ningun motibo.

Operacion Cacique Manaure
 Manera Infodefensa a informa, desde september ultimo ta realisando e Operacion Cacique Manaure den peninsula di Paraguana cu despliegue di forsa y medionan di e cuatro componente militar di Forsa Arma Venezolano, conduci pa Ceofanb.

E peninsula di Paraguana, ubica di cara na Lama Caribe den nort di Estado Falcon, ta representa e area mas nort di e plataforma continental di e pais. E tin un gran importancia strategico pa diferente motibo. Su costa occidental na ribera di Golfo di Venezuela, un area vital di e pais cu na mes momento ta comunica na banda sur, mediante un canal, cu e lago di Maracaibo unda ta extra gran parti di petroleo Venezolano. Tambe den costa occidental di Paraguana ta ubica un di e complehonan di refinamento di petroleo mas grandi na mundo. Y ademas, su proximidad na e islanan di Aruba, Bonaire y Corsou.