Nos ta den un aña parlamentario nobo, y esey semper ta bay acompaña pa discurso di Gobernador, unda gobierno di e momento ta presenta loke ta intencion den e aña nobo. E discurso no ta un mensahe personal di Gobernador, sino un documento di e gobierno local, cu e ta encabeza, pero pa cual e no ta carga responsabilidad politico. Teniendo esey bon na cuenta, cu esaki di ningun manera ta critica riba Gobernador, aki nos impresion di e discurso.

En general no por spera cu den su discurso Gobernador ta bay elabora ampliamente riba ningun tema, asina ta cu no ta straño cu no ta scucha, o lesa, tanto cos sobresaliente cu lo por sorprende nos, cu ta custumbra cu e diferente temanan cu ta bin dilanti. Sin embargo, a toca varios tema unda ta importante pa sigui elabora riba nan, hustamente pa loke no a bin dilanti den e discurso.

Un di nan ta por ehemplo e anuncio di e deseo di yega na reapertura di frontera cu Venezuela, segun e discurso di Gobernador. Ta trata aki di apertura di e frontera maritimo, pa tur claridad. Sin embargo, habri e frontera ey no por depende solamente di consideracion di importacion mas economico di fruta y berdura. Pa esey, e ta un asunto di demasiado peso, manera entrada continuo di persona indocumenta di Venezuela y otro nacion, unda a demostra den ultimo añanan cu nos autoridadnan no tin e capacidad pa contene e fluho ey. Di otro banda mester considera tambe cu no tin un situacion mas faborable na Venezuela, cu por haci cu e salida di e ciudadano Venezolano en busca di un mihor futuro lo por bira menos. Esaki ta conta pa e situacion politico, economico y social, y di violacion di derecho humano. Riba tur esaki ta bin e situacion di delincuencia relaciona cu narcotrafico den nos region, unda ta importante tuma na cuenta algun aspecto importante. Uno ta cu keto bay na nivel internacional, y sigur pa loke ta e paisnan Europeo y Norteamericano, ta considera e regimen di Nicolas Maduro como intimamente liga na narcotrafico y labamento di placa. Regularmente ta sali, den e medio aki tambe, noticia di e caso na Merca di e testaferro di Maduro, cu supuestamente tabata administra centenares di miyones di dollar di Maduro, scondi den varios empresa. Tambe tin cera na Merca e dos sobrinonan di casa di Maduro, cu tabata organiza transporte di droga via plataforma presidencial na Maiquetia. Den ultimo decadanan e organizacionnan guerrillero Colombiano a haya tur facilidad pa organiza nan logistica via Venezuela, bao gobernacion di e camaradanan Chavista, di e mesun corte ideologico. Awor, cu un gobierno izquierdista na Colombia, e pregunta grandi ta con e presidente nobo ta bay actua den e asunto aki. Ta di comprende cu e parti derechista (e.o. e organizacionnan paramilitar) den narcotrafico lo haya mas problema cu e gobierno nobo, pero ta bay percura pa control debido tambe riba e compañeronan ideologico di su propio pais? Y kico tur esaki tin como consecuencia pa e rutanan di narcotrafico den nos region? E situacion ta bira mas complica pasobra e colaboracion di e dos gobiernonan izquierdista cu Merca y Hulanda, responsable pa nos fronteranan, lo bira diferente? Tin hopi mas asunto pa tuma na cuenta cu solamente e propaganda di prijs mas abao di fruta y berdura, mientras cu ta e pregunta si esey en berdad ta bay yuda tanto. Di tur manera semper un gran parti di fruta y berdura bendi na Aruba no tabata bin di Venezuela promer cu a cera frontera.

A toca tambe e tema di e peso di interes riba prestamo cu ta afecta presupuesto di gobierno. Esey ta un problema en berdad, mas cu tur cos pasobra no kier tende di baha gasto pa por yega na un surplus mas pronto cu ta posible, pa por baha gasto di interes a traves di keda sin renoba debe, usando placa di reserva…, cu mester crea… cu surplus riba presupuesto! Menciona interes so no ta yuda, es mas ta camufla e problema berdadero, cu ta e debe astronomico mes, di 6.000 miyon florin, pasobra ta esey ta refleha den e conocido corelacion debe/GDP, cu ta na mas o menos 100%. Un biaha mas: tur cos cu ta mas cu 70% di debe/GDP, ta zona di peligro extremo. Pa pais chikito manera Aruba ta importante yega na e zona di debe manehable, cu ta 50% di GDP, cu ta algo cu nos lo alcanza, talvez, na aña 2039…, si cumpli cu e acuerdo cu Hulanda, cu gobierno ta bringando cu alma y cuerpo. Un bataya constante cu nos financista principal, mejor dicho financista unico, cu ta urgi nos gobierno pa bay den e unico direccion sensato cu tin. Tin ora cu bo ta contemplando e pleito continuo aki, bo por hasta haya e impresion cu ta nos ta financista y ta nan tin mester di nos… Ta facil awor pa pone den e discurso cu ta obhetivo pa “reduci debe y gastonan di interes di acuerdo cu normanan internacional manera recomenda pa Fondo Monetario Internacional y palabracionan haci cu Hulanda na 2018.” Hay que ver para creer… Nos tabata demasiado biaha na e punto aki pa kere cu awor si ta para e pleitonan inutil y ta cuminza enfoca riba e problemanan grandi nos dilanti. Pa esey, mester pone Aruba promer cu amigo y famia…

 

LEAVE A REPLY

Please enter your comment!
Please enter your name here