‘Ta importante pa siña di naturalesa’

ORANJESTAD – Giancarlo Nunes, kende ta traha na Parke Nacional Arikok, ta splica cu na Aruba tin varios parhanan cu a bay extinto caba den naturalesa, manera Paloma Azul y Chonchorogay. Esun mas famoso ta nos Lora, cu a disparce den naturalesa rond di e periodo 1950 – 1960.

Bon Dia Aruba a puntra Nunes tocante algun problema di naturalesa, hunto cu e parhanan, cu ta core risico di extincion aki na Aruba, y con pa ta mas consciente manera comunidad.

Nunes splica cu actualmente tin otro parhanan coriendo peliger. “Nos shoco, un parha endemico y simbolo nacional di Aruba, tabata tin menos cu 200 pareha resta riba henter nos isla den aña 1999. Awo e cantidad ta mas abou cu esey. Un otro parha endemico, e prikichi, a baha den cantidad drastico tambe.”

Segun Nunes, e prikichi na comienso di aña 2000 tabata bula rond den grupo grandi di mas cu 100 individual, pero awo mester tin suerte pa wak grupo consistiendo di 4 pa 10 individual. Patrishi ta un otro parha cu a baha drastico den cantidad den e delaster añanan.

Sinembargo, Nunes ta bisa cu no ta solamente di e parhanan, pero tambe tin e colebranan endemico, cascabel y santanero, cu ta core peliger di extincion. Na nivel nacional y internacional tambe tin e turtuganan di lama cu ta bin na remarca pa reconocimento como poblacionnan severamente reduci. Igual ta conta pa diferente tipo di pisca, entre otro e Jacupeper (Nassau Grouper). Di insectonan rond di Aruba tin e riesgo cu nan a of ta bay perdi, prome cu como hende humano ta haya e oportunidad pa descubri nan, of reconoce nan importancia.

Bon Dia Aruba a puntra den cuanto aña por ta posibel pa nan stop di existi, pa asina por bin cu cambio den e forma con ta cuida e medio ambiente. Nunes a contesta cu ta dificil pa bisa den cuanto aña precisamente por perde varios di e bestianan den peliger di extincion. Pero no lo dura mucho largo, mirando cuanto e diferente populacion di bestia a bay atras den e delaster 10 pa 20 aña.

Segun Nunes, cada bestia tin varios motibo pakico nan number ta bayendo atras. “Tin varios motibo pa e caida den cantidad di nos bestia, manera perdida di habitat pa come, descansa y reproduci; introduccion di bestia invasivo manera entre otro djaka, pushi, cacho y boa; uzo di veneno pa diferente motibo rond di nos isla; kitamento di flora Arubano y plantamento di flora exotico cu no ta sostene nos fauna.”

Pa Nunes, conscientisacion di pueblo riba e aspectonan ambiental ta un bon comienso pa mitiga e diferente riesgo pa nos naturalesa. Accion mas concreto cu por wordo tuma ta entre otro, pa planta mas mata y palo cu ta sostene e naturalesa; wanta pushi y cacho den cas of cura; no rosa tereno completo cada biaha cu mester cuminsa cu construccion; uza menos veneno of busca alternativa biologico.

Bon Dia Aruba a puntra con por keda trece cambio den comunidad pa ambiente, asina hende stop di tira sushi den matanan of den mondi. Nunes ta splica cu ta importante pa keda comunica cu pueblo y crea conscientisacion tocante e balor y bunitesa di e naturalesa unico cu nos tin aki na Aruba.

E ta agrega cu mester cuminsa specialmente cerca e hubentud, paso nan tin e capacidad pa compronde bon kico e balor di naturalesa ta, anto e ora nan por sigui pasa e mensahe pa e adultonan den nan bida. E ta curasha hende pa pasa mas tempo den naturalesa, paso esey ta bon pa salud fisico y mental, pa nan tambe paso asina hende lo aprecia naturalesa mas.

Por ta e caso cu mester evita construccion di casnan ora ta mucho cerca di naturalesa? Nunes ta bisa cu den e ‘ruimtelijk ontwikkelings plan of ‘R.O.P’ di Aruba ta para ki areanan ta naturalesa, unda mag di construi y kico mag di construi.

E ta continua bisando cu actualmente tin un concepto pa e R.O.P. nobo pa periodo 2019 – 2029. “Henter pueblo di Aruba tin acceso na dje via https://aruba-ro.nl y por duna comentario riba e concepto te cu di dos siman di Februari. Despues di esey ta keda na cada persona cu ta construyendo un cas pa haci un esfuerso pa causa menos daño posibel na nos naturalesa. Por ehempel, no semper mester rosa henter e tereno prome cu construccion.”

Pa tin un miho cuido rond di naturalesa cu matanan y flornan, Nunes ta bisa cu por planta mas mata y palo cu ta pertenece na Aruba. “Hopi di nos bestia local ta depende di nan. Mata y palo local ta sobrevivi mas facil tambe na Aruba y mester menos cuido. Mata di fruta tambe ta hopi importante pa nos fauna. Naturalesa mester di conexion cu otro areanan di naturalesa, y lo ta bon si cada bario na Aruba tin areanan cu ta designa como areanan natural conecta cu otro.”

Nunes a finalisa ta splica cu tin hende cu por causa daño. Ta importante, e ta bisa, pa keda siña tocante e naturalesa y comparti informacion cu otro. E ta bisa cu tin charlanan cu Parke Nacional ta ofrece pa trece informacion. “Pa siña mas di Aruba su naturalesa por bishita Parke Nacional pa bay hike cu un ranger. Tambe Parke Nacional tin movie nights y exhibicion informativo na e Visitor’s Center of por bishita nos pagina di Facebook.”

You May Also Like

SIA lo implementa sistema digital posiblemente den 2018

Deadline pago nummerplaat ta 31 di janurari Segun Meverly Romano, vocero di Servicio di ...

mike schreuders.jpg

Rio 2016 Mike Schreuders di 6 luga den prome heat 200m freestyle landamento

Landado Mike Schreuders a caba di competi riba e distancia 200 m freestyle. El ...

24Aug,JO, ABC.....jpg

Caso Aruba Birdlife Conservation: Tin mester di un otro hues cu no tin un pagina di Facebook

Aruba Birdlife Conservation a topa cu un otro desaroyo inespera den locual ta nan ...

‘Ta cua cashi e Dreamers tin cu bay aden?’

Que vaina. Un otro ‘sorpresa’ den e aventura di burocracia cu ta mi bida na Aruba. Despues ...

27aug, JM, Problema EPI.jpg

Gobierno a bay di acuerdo cu 4 di e 5 ultimo exigencianan di managernan di unidad di EPI

A tuma nota den medionan di comunicacion y medionan social cu tin hopi confusion ...

‘Beneficionan secundario tin mes of mas peso cu aumento salarial directo’

E introduccion y aumento di pakete di impuesto bou e nomber di crisisheffing y/of ...