Diamars merdia, Minister di Husticia mr. drs Arthur Dowers (AVP) a ricibi un presentacion na Stichting Reclassering en Jeugdbescherming Aruba riba e uso di enkelband pa cierto tipo di castigo. E presentacion a inclui entre otro e tema di supervision electronico. Durante e reunion, a presenta un sistema moderno y innovador cu ya ta den uso exitosamente na Corsou.
E compania Ingles, Buddi a duna e presentacion di su sistema di supervision electronico cu ta enfoca riba control, “tracking” y responsabilidad, usando tecnologia avansa. E sistema lo ta den uso oficialmente dia 2 di februari proximo, e minister a informa den un comunicado di prensa.
Ademas di su aplicacion den e sistema penal, e supervision electronico ta ofrece posibilidad amplio cu ta bay mas leu cu solamente sancion y control. Tambe den e area di handhaving administrativo, e sistema por hunga un rol valioso den reforsa cumplimento di reglamentonan y promoviendo un maneho mas efectivo y sostenibel.
