Gobierno di Aruba por cumpli cu e promesa di haci algo pa empleado publico recobra nan salario completo, manera e tabata promer cu e crisis di 2020. Esey danki na e negociacion cu gobierno Hulandes, cu te awor a mantene un posicion firme encuanto e recorte como condicion pa ayudo Hulandes. Esaki ta un logro pa gobierno, ya cu de paso ta saca biento for di bela di e sindicatonan, cu taba(tin) un manifestacion di malcontento planea, hustamente tocante e asunto aki. Cuanto efecto esaki lo tin riba e animo di empleado publico representa pa e sindicatonan ta dificil pa cuantifica, pasobra den pasado reciente e manifestacionnan aki a tuma lugar te perde forza convocatorio. Ta pesey dado momento e sindicatonan a cuminza pensa riba accion mas drastico, te cu huez a para esakinan. E accion di e siman aki ta parce anto ‘mosterd na de maaltijd’.

A proposito, mester bisa cu tin un aspecto cu ta molestia den e discurso publico di e sindicatonan cu ta representa empleado publico, y esey ta cu henter ora ta usa e palabra ‘pueblo’, como sifuera nan ta representa e pueblo ey. Asina leu cu nos ta corda, nan ta representa un di e partinan mas privilegia di e comunidad aki, cu contrario na pueblo ta goza di pago di salario garantiza y un luho di dia liber cu sector priva no tin. Ademas, fuera di esey, ta pueblo lo mester bay paga cu ta fia pa paga e salarionan ey. No pretende di ta representando pueblo si bo no ta…

Cu e vuelta encuanto recorte di salario aki claramente un victoria pa gobierno, e sindicatonan por bay prepara na mes pa un bataya mas fundamental, cu ta e defensa di nan miembronan den e ronda di reforma cu mester bay tuma lugar den e aparato publico. Y no mester carga speranza cu esey no ta bay tuma lugar, pasobra e hecho cu a yega na un acuerdo cu Hulanda ta indica cu a yega na un acuerdo tambe encuanto posicion di gobierno di Aruba pa cu e leynan di COHO y RAft. Den parlamento por tin algun malcontento formula – cu no ta comparti cu nos tampoco – pero esey no ta cambia e realidad cu e ‘first team’ di e partidonan den coalicion a bay di acuerdo caba cu ta pasa e dos leynan den parlamento Hulandes. Por interpreta e acuerdo cu secretario di estado van Huffelen asina, cu a entrega algo – e 12,6% – a cambio di apoyo pa e proyectonan di ley? Di ambos banda por anticipa un negacion rotundo cu esey lo tabata e caso, y esey nos ta laga asina tambe. E motibo ta cu nos ta considera cu di tur manera ta mas cu probable cu e leynan lo pasa, aunke den parlamento Hulandes tambe tin bastante pregunta y interogante. Sin embargo, e probabilidad cu e leynan ta bay back na mesa di diseño no ta asina grandi. Esey na su turno ta significa cu definitivamente nos ta yegando na e momento cu mester cuminza

implementa. Y aki ta unda e dolor pa e partidonan den gobierno ta. Pasobra un cos ta pa vocifera cu ta di acuerdo cu e reformanan, pero ta otro cos pa bay implementa un monton di medida impopular. Esakinan por tin un efecto negativo pa e partidonan den gobierno den siguiente eleccion, y ta basicamente pakico desde 1986 ningun gobierno tabata dispuesto pa encarga su mes cu reforma, cu no a bira urgente dia Hulanda a trece nan dilanti. Nan tabata urgente pa añas caba, pero cada gobierno tabata hunga ciego, sordo y mudo ora e temanan aki tabata bin dilanti, señala pa yiunan di tera, entre nan tambe empleado publico cu tabata haci nada mas cu sigui nan consenshi y nan obligacion pa traha pa Aruba, no pa un bandera politico. E personanan cu durante decada a mira nan intento di mehora algo den e sistema politico y nos aparato gubernamental fracasa, a mira nan deseonan den un lista largo cu Hulanda a presenta gobierno di Aruba. Nan (Hulanda) tabatin algo di ofrece cu e ciudadanonan no tabatin: placa bruto pa remedia e situacion. Gobierno di Aruba a reconoce cu den e situacion ey no tabatin alternativa y a bay di acuerdo cu loke ta pasando awor. Cu de vez en cuando nos tin algun parlamentario cu kier haci nan mes ridiculo cu e yoradera tocante autonomia cu a bay perdi, no ta cambia nada na e situacion di supervision bao di cual nos ta bay biba proximamente.

Tin un aspecto grave cu a keda ainda, y esey ta e ambiente negativo cu e parlamentarionan, den gran mayoria, ta creando. Esey ta haci cu no lo tin un ambiente positivo unda hunto cu Hulanda ta desaroya e mihor plannan, cu bienestar di Aruba na mente. Ta intolerable cu e mesun hendenan cu ta grita a diario cu nan tin ‘interes di pueblo na pecho’, o cu ta ‘pone e ser humano central’, no ta cuminza un debate serio tocante e lista largo di cos cu mester mehora. Nos por ta di acuerdo cu mester mehora, den teoria, pero pa logra haci esaki di e mihor forma, esey nos no ta logra cu e negativismo di pinta Hulanda como e malhechor, mientras ta nan mes a daña e lugar aki. Asina aki nos lo haya solamente un continuacion di e trancamento di reforma.

LEAVE A REPLY

Please enter your comment!
Please enter your name here