Ta tene cuenta cu privacidad di ciudadano; Director Haime Croes: DIP no ta comenta riba caso individual di tereno

DIP normalmente no ta bisa nada di ningun caso di ningun hende. Asina Director di DIP, dr. Haime Croes a bisa Bon Dia Aruba. For di algun tempo caba ta drenta diferente notificacion di casonan di maneho di tereno cu ciudadanonan ta considera robes of por lo menos sin transparencia.

Bon Dia Aruba den tur e casonan aki ta acerca DIP pa haya informacion riba kico ta pasando cu e diferente terenonan, incluso un tereno huur na Catiri cu un famia tin den posesion for di 1962 pa asina cria bestia y planta. Pero tambe tin pregunta riba otro terenonan cu ta mustra di no tin claridad riba nan.

Segun dr. Croes, cada caso ta keda discuti internamente y si tin pregunta, DIP ta trata cu esakinan ta mesa cu e personanan envolvi. “Motibo ta privacidad di ciudadanonan,” Director di DIP a bisa.

“DIP tin di haber cu hopi hende cu ta pidi pa diferente producto. Y mester respeta privacidad di hende pa escogencia di cierto producto. P’esey DIP ta limita su comentarionan mayoria biaha riba maneho teritorial, y no ta enfoca riba casonan individual,” dr. Croes a bisa Bon Dia Aruba.

Pero asina mes, Bon Dia Aruba cu su responsabilidad di informa mas balansa posibel, ta sigui acerca DIP pa pregunta riba casonan presenta na nos redaccion.

Subasta proyecto Rodger’s Beach

Ehempel ta un publicacion di proyecto riba erfpacht na Seroe Colorado. Ta trata aki di Seroe Colorado sin number, situa riba un tereno erfpacht cu ta vence 2 di Juli 2068 na Rodger’s Beach. E proyecto ta un edificio comercial cu no a caba di construi, Pero e ta riba un tereno di 6309 meter cuadra, cu a haya riba 14 di April 2008. E ta inclui otro parcela di tereno erfpacht, di un grandura di 1383 meter cuadra cu e desaroyadonan a ricibi na 2016.

E proyecto aki ta na benta, pa medio di subasta, unda e suma inicial ta na 3.463.880,00 miyon florin of 1.946.000,00 dollar Mericano.

Dr. Croes a bisa Bon Dia Aruba cu benta di tereno erfpacht cu ta bashi no ta permiti. E ta diferente ora cu tin un construccion riba dje.

Un observado a bisa Bon Dia Aruba cu e caso aki ta ilustra e problema den maneho di tereno comercial. Pasobra normalmente un banco no ta extende henter e suma te ora cu caba cu e construccion. Ta duna e suma den fase. Den otro palabra, awor ta bende e proyecto pa un suma di casi 3.5 miyon florin y e pregunta ta si berdad a inverti e suma ey den e construccion. Pa colmo, a extende e tereno hasta prome cu a caba cu e construccion original.