Riba plaso largo, innovacion tecnologico den tur so formanan ta e motor di prosperidad, crecemento economico, y bienestar humano. Si nos wak e delaster 200 aña, civilisacion humano a haci stapnan inmenso, den tur esaki. Anno 2026, esaki tambe ta aplicabel pa isla di Aruba.

Mi meta cu mi columnanan ta pa stimula innovacion tecnologico riba Aruba, pa asina den plaso strategico aumenta bienestar y reduci sufrimento humano. Loke cu ta haci esaki mas grave ainda, ta cu Aruba tin varios crisis cu e ta enfrentando, manera crisis di costo di bida, crisis di vivienda pagabel, y mas. Hopi di esakinan por wordo alivia den gran parti si bin innovacion bon pensa cu politica strategico.

Den e delaster 4 aña, eigenlijk den desesperacion completo pa preveni, loke ta pasando rond mundo henter cu ta intrankilidad social profundo y tur e consecuencianan severo cu esaki lo tin. A haci mi deber di skirbi di varios innovacion tecnologico, cu stappenplan detaya, beleidplannen etc.

Un resumen di esaki ta lo siguiente:

● Un fabrica di panel Perovskite solar na sitio di San Nicolas.

● 3D Printing di Cas.

● Container Farming avansa.

● RoboTaxi pa transport gratis publico.

● Un schema financiero con cada cas por yega na su mesun panelnan solar cu sistema di bateria.

● Haci tur cas/edificio energie-zuinig.

● Uza Robotica pa diferente sector.

● Uza tecnologia di AI pa automatisa Salubridad y Ley.

● Bin cu vermogensbelasting pa asina funda un Universal Basic Income.

E impacto positivo di tur e innovacion tecnologico menciona por ta inmenso mes. P’esey e ta desapunta mi cu cada pasa dia mas y mas, cu nos no ta wak ni un nanogram di esaki, den e maneho strategico di nos pais. Pa mi esaki no ta solamente hopi straño, pero casi un crimen intelectual riba nos pueblo. Aunke e gran mayoria di pueblo no lo tin e besef cu nan calidad di bida por ta sumamente mas miho, si pas aplica innovacion tecnologico den setting local. Pero lo yega un dia, den futuro relativamente cercano unda tur e crisisnan social lo cuminsa manifesta su mes den presion riba nos ultra-kader, cu a simplemente scoge pa no actua na tempo y cu tanto na tanto advertencia.

Alhoewel esnan den Cocolishi porta ta sinti confortabel ainda, un “’Day of Reckoning”, lo bin eventualmente. Cu e deficit den e bestaansminimuum ja caba na casi 600 florin, y presionnan inflacionario inmenso full rond mundo, esaki no lo dura largo. Esaki no ta cualkier “pronostico religioso”, paso si nos wak rond mundo, ora tin demasiado presion social, principalmente den costa di bida, lo yega un breekpunt unda esaki lo cuminsa traduci su mes intrankilidad social.

Di mi banda, a adverti, conseha, a skirbi pa casi 4 aña, pa preveni tur cu lo bay transpira. Lastimamente tur esaki no a wordo tuma na serio. Den fin ta e ultra-kader mes lo sufri e consecuencianan di esaki.