(AP) – Mientras residentenan na e frontera di Tailandia y Cambodia a huy for di e bataya andando, varios a purba bay cu nan mascota. Sinembargo pa esnan cu no por a haci esaki, oficialnan a duna un man pa yuda.
Tailandia su Livestock Department a pidi su oficialnan local provee un espacio safe pa e bestianan kende su doñonan mester a evacua, y e oficina den varios provincia na e frontera a anuncia cu nan tabata cla pa haci esaki.
Na e provincia Surin, varios haula a ser poni bao carpa dilanti Livestock Breeding and Research Center como espacio temporario. 5 cacho y 2 pushi tabata kedando na e centro diadomingo. E capacidad ta te alrededor di 20 bestia.
Sornchai Kongsook, director di e centro, a bisa cu e doñonan por laga nan mascota gratuitamente, pero nan mester por bishita tur dia pa cuida di e bestia. “Nos a habri nos espacio pa pushi y cacho cu e residentenan of agricultor no por hiba un centro di evacuacion,” el a comenta. “Tambe tin algun dono cu a scoge di keda na un hotel, cual no ta permiti mascota.”
El a bisa cu tambe ta permiti ganado, aunke ningun a ser laga te ainda. Oficialnan a prepara cuminda pa distribui na bacanan y bestianan similar cu a ser laga atras den zonanan di peligro. Varios Tailandes bibando na parti noord-oost ta agricultor y usualmente tin ganado. Varios di nan ta cana den e veld na areanan cu awo ta desierto.
E chokenan arma entre Tailandia y Cambodia desde siman pasa a laga decenas di persona morto y a desplasa miles.
