(AP) — China a manda 25 avion si guera y tres barco den direccion di Taiwan ayera mainta, segun ministerio di Defensa di e isla a bisa, mientras tensionnan ta keda halto entre Beijing y e sostenedor mas grandi di Taipei, Washington.
E ministerio a bisa cu 19 di e avionnan aki a crusa den zona di identificacion di defensa aereo di Taiwan mientras cu e barconan tabata continua operando den Estrecho di Taiwan. A bisa cu Taiwan a responde door di manda barco, avion y activa sistemanan di defensa misil na costa pa “monitor di cerca y responde.”
China ta ehecuta incursionnan asina a base casi diario, parti di loke ta considera tacticanan di “zona shinishi” cu meta pa intimida y gasta ekipo di Taiwan, cansa su personal y degrada moral publico.
Esakinan tambe ta inclui guera cibernetico y campañanan di desinformacion, hunto cu un impulso sin fin pa priva Taiwan di aliadonan diplomatico.
Taiwan a responde door di mehora su flota di jet F-16 y bestel 66 mas di e avionnan for di Merca, mientras a cumpra un variedad di otro arma y a extende su termino di servicio militar obligatorio pa tur homber, di cuatro luna pa un aña.
E incursionnan di ayera tabata relativamente modesto pa standardnan recien. Durante weekend di Dia Nacional di China na 2021, Beijing a manda 149 avion militar sur occidente di Taiwan den formacion di atake. Na augustus, como respuesta na un trip na Taiwan di e presidente di Congreso Mericano e tempo ey, Nancy Pelosi, China a ehecuta ehercicionan di guera rond di e isla simulando un blokeo y a lansa misil riba dje den Ocean Pacifico.
