Recientemente Taskforce di Reino pa Derecho di Mucha a tene un reunion exitoso na Aruba, marcando un logro importante den e colaboracion continuo pa fortifica proteccion y promocion di derechonan di mucha den henter Reino.
E reunion a keda presidi pa Sra. Sacha Geerman di Ministerio di Asuntonan Social di Aruba, kende actualmente ta fungi como Presidente di e Taskforce. E encuentro aki tawata e prome reunion en persona desde e desaroyo y aprobacion di e Cuadro Strategico, Plannan di Accion Nacional y Cuadro di Monitoreo. E documentonan aki a wordo crea cu ayudo di UNICEF Hulanda. Pa prome biaha den historia di e Taskforce nan tin un acercamento structura y midibel pa cooperacion entre e islanan.
Como consehero strategico di Taskforce, UNICEF Hulanda tambe tawata presente durante e reunion, ora cu cada isla a comparti e resultadonan di un tarea, resaltando diferente situacion vulnerabel cu muchanan ta enfrenta dentro di nan contexto local. Saba a presenta riba vulnerabilidad di muchanan migrante den enseñansa, Bonaire riba criminalidad hubenil, Corsou riba muchanan indocumenta, St. Eustatius riba muchanan cu autismo, St. Maarten riba hubentud y criminalidad y Aruba riba muchanan cu necesidadnan special.
E reunion a inclui tambe discusionnan riba cuido residencial entre isla y paisnan den Reino, Aruba su plan di mayor y e programa “Alleen jij bepaalt” riba prevencion y cambio di comportacion. E miembronan di Taskforce tambe por a experencia Team-up: un programa cu ta duna sosten psicosocial na muchanan ku ta enfrenta circunstancianan vulnerabel.
Den su palabranan di apertura, Minister di Asuntonan Social, Cuido di Adulto Mayor y Maneho di Adiccion, Sra. drs. Mervin Wyatt-Ras, a yama e miembronan di Taskforce bon bini cu un discurso inspirador cu a enfatisa e poder di colaboracion y e responsabilidad comparti di tur isla pa salvaguardia derechonan di mucha.
Durante e consultanan, e paisnan Aruba, Corsou y St. Maarten a duna informacion riba e progreso haci pa loke ta trata e recomendacionnan di e Comite pa Derechonan di Mucha, for di e audiencia di 2022. Miembronan tambe a intercambia update riba e monitoreo di plannan di accion nacional y a haya e oportunidad pa intercambia cu Aruba su Comision Derecho di Mucha.
E programa a conclui cu bishitanan opcional na Scol basico Dornasol y Scol Dun’ un man. Tur dos ta sostene muchanan cu necesidadnan special den enseñansa.
Taskforce a expresa gratitud na Gobierno di Aruba pa su caluroso hospitalidad y organisacion exitoso di e reunion. E islanan a reafirma nan compromiso conhunto pa sigura cu cada mucha den Reino por crece sigur, cu oportunidad y acceso igual na cuido, educacion, y proteccion.
Tocante Taskforce
Taskforce di Reino pa Derechonan di Mucha a keda institui despues di e Conferencia di Reino di 2 di aprel 2014, cu a tuma luga na Aruba. Taskforce ta promove cooperacion den henter Reino pa fortalece implementacion di e Tratado di Derecho di Mucha den e parti Caribense di Reino. E ta consisti di representantenan di Aruba, Bonaire, Corsou, Saba, St. Eustatius, St. Maarten, y di Ministerio di Asuntonan Interno y Relacionnan den Reino (BZK) y Ministerio di Salubridad Publico, Bienestar y Deporte (VWS). UNICEF Hulanda ta sirbi como consehero di Taskforce.
