Na Corsou oficialmente a lansa e plataforma di streaming cu yama TAYA, un plataforma di ‘streaming’ pa Corsou. E plataforma aki ta reuni peliculanan di nos isla na un luga. Cu pelicula nan den categoria nan manera pelicula kortico, fixcion , documental y peliculanan clasico, TAYA ta cla pa publico di nos islanan y rond mundo disfruta di loke ta di nos.

 

Riba TAYA tin clasico nan manera Ava & Gabriel te pelicula nan mas resien manera Yamada. E structura di e plataforma por ser considera como un videoteka online. Esaki ya como cu e publico por scohe e pelicula cu nan kier wak, cumpra of huur. Nos tin sigur cu e amantenan di cine rond mundo poco poco ta bin wak y explora e coleccion di cinenan di nos mes.

E structura ariba menciona ta haci posibel tambe cu por ehempel famianan, organisascionnan y hasta scolnan facilmente por yega na e contenido cu nan kier wak pa cualke ocacion.

 

TAYA a nance di un constacion cu hopi pelicula di nos islanan despues di nan estreno no ta acsesibel niun caminda mas. Na varios ocacion iniciado di e plataforma productor Sulin S. F. Passial a keda aserca pa wak con ta yega na peliculanan di nos. Sea cu ta algo cu el a traha riba dje of no. Esaki tabata parti di e inspiracion pa start TAYA. Ademas den combersacion cu diferente ciniastra e a constata cu tin tera fertil pa algo asin’aki di parti di e ciniasta nan tambe. Di einan a cuminsa cu e proseso pa crea e loke awe ta TAYA.

 

Manera indica anteriormente e plataforma digital aki ta iniciativa di productor Sulin S.F. Passial. Como doño di Pantaya Chica Productions y miembro activo di e mundo di cine di Corsou, el a disidi di cuminsa TAYA. Segun Sulin “TAYA ta un colaboracion entre mi colega nan den mundo di cine mas cu tur cos. Mi por a inicia esaki, pero sin nan confiansa y colaboracion TAYA lo no tabata posibel”. Banda di e grupo di siniastanan cu a pone nan peliculanan disponibel, e proyecto aki ta keda hasi posibel cu entre otro cooperacion di Prins Bernhard Cultuurfonds Caribisch Gebied.

 

TAYA ta acsesibel for di awor via di taya.tv. Pues publico rond mundo ta invita pa subi y cumpra of huur nan peliculanan local y disfruta di e talento di loke nos mes hende nan por. E proseso pa hasi esaki ta masha fasil: 1. Subi riba taya.tv 2. Scohe e pelíkula di bo smak. 3. Klik riba get access now. 4. Sigui e stapnan 5. Disfruta di bo pelicula. Riba TAYA tin na e momento aki 15 pelicula y e catalogo ta sigui crese. Pues pa keda informa di tur detaye Sigui nos na @tayabypac riba facebook y Instagram.