Gobierno di Aruba, por medio di Minister di Finanzas, Asunto Economico y Sector Primario, mr. Geoffrey Wever (Futuro), a inaugura e siman aki un tayer informativo crucial dedica na comerciante, empresario y proveedor di servicio cu ta traha cu Gobierno di Aruba. E tayer ta enfoca riba e ley di destaho (Aanbestedingsverordening AB 2019 no. 39) y e decreto general di destaho (Aanbestedingsbesluit AB 2024 no. 14), cu lo drenta na vigor dia 1 di januari 2026.
Minister Wever a expresa su aprecio na Departamento di Finanzas, particularmente na señora mr. Rita Werleman, señora Angelique Bagheri y señora Sandra Burke, pa nan trabao intensivo den prepara y ofrece tayernan tanto pa sector publico como pa proveedornan di Gobierno.
Segun Minister Wever, e implementacion di e reglanan nobo ta un avance significativo pa transparencia y responsabilisacion den tur destaho gubernamental. E ley ta rekeri publicacion obligatorio di destahonan binidero, suspension, terminacion y nombramento di compania ganadornan.
E cambionan den procedura ta duna:
Mas flexibilidad pa proveedornan;
Mas claridad y fundamentacion den decision gubernamental;
Proteccion legal mas amplio, incluyendo un periodo stipula pa presenta bezwaar prome cu firma final di e acuerdo;
Competencia husto y igual oportunidad pa tur participante;
Posibilidad pa incorpora criterio ambiental den destahonan.
Minister Wever a enfatisa cu e modernisacion di e cuadro legal ta contribui directamente na un “level playing field”, stimula economia, y ta sigura cu recursonan financiero di Pais Aruba ta wordo usa den un manera responsabel y integro.
E minister a invita tur participante pa haci uso di e sesion pa formula pregunta y haya claridad directo di e ekipo di experto di Departamento di Finanzas.
“E ley ta cla, accesibel y igual pa tur proveedor y esaki ta base pa un economia fuerte y un gobierno husto”, segun Minister Wever.
