Matrimonio di convenio y falta di lealtad, frustracion cu votonan perdi den e sistema di ‘restzetels,’ ta djis algun di e retonan cu democracia na Aruba ta confronta . Esey ta locual a oradonan di e tayer “Eleccion 2024 na Aruba y kico a bin despues,” na Universidad di Aruba a trece dilanti recientemente.

E tayer tabata un iniciativa di Profesor dr. Wouter Veenendaal di Universidad di Leiden, hunto cu Centre of Lifelong Learning di Universidad di Aruba, bou auspicio di e Instituto Arubano pa Bon Gobernacion y Liderazgo (Aruba Institute for Good Governance and Leadership) GG&L, di Universidad di Aruba. Dr. Veenendaal ta Profesor den ‘Representacion Democratico den Reino Hulandes.”

Historiado y antropologo dr. Luc Alofs a papia riba e asina yama ‘Checks and Balances,” esta e control riba Gobierno y si coalicion ta solucion. Su presentacion no tabata dirigi pa bin cu recomendacion, sino pa duna un bista di e consecuencianan di e sistema di formacion.

Alofs a bay den e historia for di e prome Gobierno di Aruba cu tabata un coalicion, cu tabata kier a tene MEP afo. “E tabata tur contra un,” Alofs a conta. Pues e coalicion por a keda califica uno di conveniencia, Alofs a ilustra. Pero den e matrimonio politico aki a crea e fenomeno di Ministernan cu ta actua como Rey riba nan mesun reinado (Ministerio). “Y tambe a nace e famoso ‘yabi,’ cu ta partidonan chikito cu tin e poder pasobra mester di nan pa forma Gobierno y tambe mantene e Gobierno riba pia.” E resultado di partidonan ‘yabi’ ta coalicionnan cu ta mara na e exigencia di partidonan chikito cu no tur ora ta leal na e gabinete.

Consecuentemente, un caracteristica di Gobiernonan di coalicion, cu excepcion di Oduber 1, ta instabilidad.

Brechtje Huiskes y Hannah Meijer di Facultad di Derecho di UA a splica cu nos sistema democratico ta copia di esun Hulandes, cu un Gobierno di un banda y Parlamento di otro. E sistema aki lo mester crea control, pero practica ta mustra cu e ta mas dificil den un sociedad chikito di isla. E investigadonan a analisa e disciplina di partido den un Parlamento chikito, e conflicto entre e lealtad pa coalicion y e tarea di control Parlamentario, entre otro. “Nos ta nota cu politiconan ta papia hopi di confianza, sea di otro, di partidonan di coalicion y Parlamentarionan.” Como tal, ta bin crisis ora cu ta perde confianza den e lealtad di e partner di coalicion y esaki ta conduci na abandono di e coalicion.

A describi e fenomeno aki como e funcionamento di reglanan dualistico den sistema Parlamentario di Aruba (pero tambe di Corsou y St. Maarten, pues paisnan CAS). Partidonan ta rekeri lealtad y confianza, cu hopi biaha ta bisto den e trabou parlamentario. E impacto riba democracia ta cu Gobiernonan ta cay, tin mas eleccion y comunidad ta perde confianza den institucionnan democratico, mientras cu Gobierno mes (basa riba partidonan politico) ta descurasha e uso di podernan constitucional di Parlamento y finalmente ta politiza funcionnan neutral cu ta impedi debatenan democratico den Parlamento.

Huiskes y Meijers ta recomenda pa bin clarificacion y proteccion di e di e reglanan dualistico, pa evita un asina yama ‘Stempel Parlament,’ pa pone prioridad riba control institucional en bes di politica partidario, mientras cu Gobierno mester ta habri pa opinion diverso di partnernan den coalicion sin ataca directamente e Parlamentario. Un herment ta pa nombra un Presidente di Parlamento cu ta bin di oposicion, cu no ta mara na palabracion di partidonan ora di forma Gobierno, pa asina sigura un posicion mas neutral posibel.

Mr. Luciano Milliard, hurista y docente di Universidad di Aruba a a repasa cua e splicacionnan di democracia cu a conoce diferente definicion, pero cu e formulacion di Abraham Lincoln, cu a bin cu e definicion ’di hende, dor di hende y pa hende.’ “Pero mas importante pa mi awor ta con hendenan ta Aruba ta defini Democracia awor. Kico nan ta spera y kico kier.” Milliard a bisa cu basa riba su investigacionnan, na Aruba ta defini democracia como un sistema cu ta liber, husto y ta hiba bon maneho di recursonan nacional. “Liber di ta oprimi, di por expresa opinion; husto pa tur hende, unda tur tin acceso igual pa metanan comun, manera vivienda, educacion,” Milliard a ilustra “Y pa loke ta e ultimo punto, maneho di recurso nacional, tin un sentimento creciente cu kier mira mas di locual ta produci bolbe pa Aruba.” E realidad di un Gobierno cu no tin un Parlamento cu ta controla debidamente, e falta di transparencia den servicionan publico y decisionnan di Gobierno cu no crea oportunidad igual, ademas cu no ta atende suficientemente e problematicamente social ta crea pregunta riba democracia. “Ta problemanan cu nos conoce, pero di otro banda, nos tin hopi pa ta contento cune. Democracia no ta algo cu ta bin di mes y mester ta cuida,” Milliard a mustra.

Investigado y economista Rendell de Kort a mustra cu tin otro forma pa calcula reparticion di asiento den Parlamento cu locual ta usa awor, e metodo Hulandes D’Hont. De Kort, kende a a trata e tema di aplicacion di representacion proporcional den isla chikito y si e ta sirbi su proposito ainda a ilustra e formula ta hayando mas critica den sociedadnan cu kier mas representacion representativo. E tema di reparticion di asiento y e restzetel cada eleccion ta bira mas fuerte, particularmente si mira con partidonan grandi ta probecha di e sistema. Den e ultimo eleccion a reparti no menos cu cinco restzetels, cu ta nifica cu un grupo grandi di votado no a keda representa den Parlamento. Cu cambio den formula di calculacion diferente, e por tin efecto pa constelacion di Parlamento y Gobierno cu ta refleha miho e deseo di e votado. Asina por ehempel tin un proposicion pa cambio di ley den Parlamento mes, cu ta brinda un reparticion cu ta refleha mas cerca e deseo di e votado. E pregunta ta awor si partidonan den Parlamento ta dispuesto pa trece e cambio.

Cambio lo por bin den maneho di Gobierno y Parlamento cu presion di gruponan civico. Mr. Helmut Vink a splica e rol di organisacionnan civico den influencia maneho di Gobierno, particularmente gruponan religioso. Participacion di gruponan civico, sea ta asociacionnan comercial, di deporte y otro, incluso esnan religioso den e esfera publico ta esencial pa un democracia vital, Vink a ilustra, ya cu ta percura pa participacion di ciudadanonan den discusion di temanan. E sistema democratico di Aruba ta reconoce esaki tambe, cu ta splica con importante e reunionnan cu e Formado di Gobierno ta tene despues di un eleccion. Pero e proceso ta inicia prome cu esey, esta cu programanan di partido pa bay eleccion cu tambe ta keda formula a base di opinion y contribucion di ciudadanonan. Vink, den su investigacion a saca afo areanan unda organisacionnan Cristian a traha pa influencia maneho di Gobierno y/of traha cu Gobierno den e area di servicio publico.