(AP)—Taylor Swift un biaha mas ta lidera e lista di nominacionnan pa e iHeartRadio Music Awards 2026 cu nuebe nominacion. Despues di dje ta sigui Bad Bunny, Sabrina Carpenter y Alex Warren, ken tur ta empata cu ocho nominacion cada un.
E iHeartRadio Music Awards ta honra e artistanan mas toca di e aña riba su stacionnan di radio y riba e app. Aña pasa, Swift y cantante di genero ‘country’ Morgan Wallen tabata lidera e nominacionnan cu 10 cada un. Swift tambe a lidera e nominacionnan na 2024 y 2023, ora cu el a empata cu Lizzo y Harry Styles.
E biaha aki, Swift ta nomina pa categorianan manera Cancion, Artista, Artista Pop, Cancion Pop di Aña, Miho Letra, Miho Video Musical, Faborito Riba Pantaya, Estilo di Tour Faborito y tambe pa un categoria nobo pa 2026 cu ta basa riba votacion di fanaticonan: Baile Faborito di TikTok.
“Esaki ta un show di premio anual crea exclusivamente pa fanaticonan, celebrando e cancion y artistanan mas grandi cu nan a gusta scucha riba stacionnan di iHeartRadio y den nos app durante henter e aña,” segun John Sykes, presidente di entretenimento, y Tom Poleman, director principal di programacion na iHeartMedia, den un declaracion conhunto.
Pa e categoria Artista di Aña, Swift ta competiendo contra Morgan Wallen, Sabrina Carpenter, Bad Bunny, Benson Boone, Chris Brown, Jelly Roll, Kendrick Lamar, Lady Gaga y Tate McRae.
Den categoria Cancion di Aña, e cancion di Swift “The Fate of Ophelia” lo enfrenta “Love Somebody” di Wallen, “Manchild” di Carpenter, “Sorry I’m Here For Someone Else” di Boone, “Anxiety” di Doechii, “Good News” di Shaboozey, “Ordinary” di Warren, “Luther” di Kendrick Lamar y SZA, “Mutt” di Leon Thomas y “Stargazing” di Myles Smith.
Fanaticonan por vota den varios categoria, incluyendo Debut Faborito na Broadway, Baile Faborito di TikTok, Album Debut Faborito, Miho Letra, Miho Video Musical, Faborito riba Pantaya, Fotografo di Tour Faborito, Banda Sonora Faborito, Estilo di Tour Faborito, Tradicion di Tour Faborito y Colaboracion K-pop Faborito.
Votacion social ta tuma luga riba iHeartRadio.com/awards y lo cera dia 19 di maart pa tur categoria.
E iHeartRadio Music Awards 2026 lo ser transmiti en bibo for di e Dolby Theatre na Los Angeles dia 26 di maart 8or di anochi EST riba FOX. Tambe lo transmiti e ceremonia riba stacionnan di iHeartRadio pa henter Merca y riba e app.
