Despues di retiro di Sr. Ady Thijsen como Minister Plenipotenciario, Gabinete AVP-FUTURO a nombra dos candidato, primeramente minister Rene Herde y despues parlamentario Jennifer Arends-Reyes, pero na final ningun di dos nombramento a ser concretisa y te dia di awe ainda no tin un Minister Plenipotenciario.
Na momento cu Gabinete AVP-FUTURO a haci su entrada como gabinete, Sr. Thijsen a ricibi su “eer van ontslag” como Minister Plenipotenciario na Hulanda. Sr. Thijsen tambe tabata representante di Aruba den Union Europeo.
Aruba ta un isla cu un laso special cu Union Europeo y ta un di e islanan LGO (Land en Gebied Overzee) den Union Europeo. E organisacion OCTA ta representa tur e islanan aki na Bruselas y na cierto momento Aruba a haya e presidencia di e comision y Sr. Thijsen a bira e presidente cu a carga e responsabilidad aki desde 2022.
Segun minister di Relacionnan den Reino, Gerlien Croes a splica anteriormente Sr. Thijsen a haya su mes cu un reto financiero cu a sucede bou di e presidencia prome cune y tambe bou di su presidencia tabatin algun malcomprendemento y retonan cu e comision Europeo cu ta duna OCTA placa pa haci e trabounan pa e islanan.
Considerando e situacion aki a bin un proceso largo unda cu nan a sinta negocia cu e comision Europeo, a bin abogadonan den e ronda y na momento cu Sr. Thijsen a ricibi su “eer van onstlag”, e ex minister plenipotenciario a comparti cu gobierno nobo e situacion cu tabatin na Union Europeo y como presidente di e comision tabata desea di termina e proceso of laga un dossier atras pa esun cu lo tuma over pa por continua cu lo necesario.
Gabinete AVP-FUTURO a duna e OK na Sr. Thijsen y a dun’e dos luna di tempo pa haci e trabou aki teniendo na cuenta cu tanto e minister plenipotenciario como representante na Union Europeo ta un funcion politico.
Despues di su huramentacion Gabinete AVP-FUTURO a nombra Sr. Rene Herde como e candidato oficial pa bira Minister Plenipotenciario. Pero esaki no a keda concretisa y Sr. Herde a ser nombra minister di Infrastructura, Energia y Telecomunicacion na luga di parlamentario Mike de Meza. Esaki, medionan di comunicacion local, ta pa un periodo temporal mientras cu parlamentario de Meza ta soluciona su problemanan legal.
Despues Gabinete AVP-FUTURO e ora a nombra parlamentario Jennifer Arends-Reyes como candidato pa e cargo di Minister Plenipotenciario, cual na final di dia e parlamentario a rechasa.
Mediante un comunicado di prensa parlamentario Arends-Reyes a informa cu despues di reflexion profundo y consideracion serio”, el a tuma e decision pa no acepta e oferta pa bira e proximo Minister Plenipotenciario di Aruba na Hulanda.
“Mi ta sumamente honra di a ser acerca y considera pa un posicion asina importante. E hecho aki ta pa mi, un gran reconocemento pa mi trayectoria politico y profesional,” Arends-Reyes a bisa den e comunicado.
Segun e parlamentario despues di haya hopi conseho y analisa e situacion di reto cu e pais ta enfrenta actualmente, el a conclui cu su lugar ta aki na Aruba. “Mi compromiso y responsabilidad ta pa sigui traha pa bienestar di Aruba, incluyendo asuntonan importante pa nos studiantenan den exterior y asuntonan di reino cu ta importante pa e futuro di Aruba.”
Segun e comunicado, e decision pa keda Aruba no ta uno tuma facilmente, pero cu un profundo sintimento di responsabilidad y amor pa su pais.
E decision di parlamentario Arends-Reyes ta refleha dos aspecto di e realidad politico di Aruba.
Di prome, e hecho cu un politico cu keda eligi den Parlamento tin e deber di representa su votadornan. Parlamento ta encarga di controla e trabao di gobierno, y tin derecho y habilidad pa haci pregunta y haya informacion relevante tocante diferente aspecto cu ta afecta e ciudadanonan di Aruba. Na momento cu e ciudadanonan pone confiansa den un politico, nan ta spera cu e politico ey lo ta den Parlamento defendiendo nan interesnan. Na momento cu e politico scoge un otro posicion, e ta laga su votadornan sin representacion parlamentario.
E decision di parlamentario Arends-Reyes ta mustra su interes den cumpli cu su votadornan door di keda den Parlamento en bes di bay mesora pa un posicion ministerial na Hulanda.
Di otro banda, di punto di bista politico, e posicion di Minister Plenipotenciario na Hulanda ta bira un sorto di “out of sight, out of mind”, unda e politico ta keda leu di mente di pueblo, y esaki por tin consecuencia negativo pa su carera politico. Kedando na Aruba, e ta keda traha y keda den mente di su votadornan, y ta haya oportunidad pa cumpli cu su promesanan di campaña of profila su mes miho pa un siguiente eleccion.
Na final di luna di juni minister Gerlien Croes a anuncia cu Gabinete AVP-FUTURO a aproba un decreto ministerial pa inicia cu e renobacion oficial di Arubahuis – e sede oficial di Gabinete di Minister Plenipotenciario di Aruba na Den Haag, pero no a duna ningun informacion di un posibel candidato pa e cargo di Minister Plenipotenciario.
Minister Croes a bisa cu e renobacion aki no ta solamente un renobacion fisico, pero un restauracion di respet pa pais Aruba y e hende cu ta representa Aruba cu orguyo, y cu e ta un oportunidad nobo pa duna contenido nobo y debido na traha riba Aruba su relacion y cooperacionnan den reino. Pero e representante di Aruba na Hulanda mes ainda no ta conoci.
Bon Dia Aruba a tuma contacto cu minister Gerlien Croes pa puntra si gobierno tin un candidato den bista pa e cargo di Minister Plenipotenciario y a puntra tambe ken ta encarga mientras tanto pa cumpli cu e responsabilidadnan di e Minister Plenipotenciario na Hulanda te ora cu logra nombra un persona. Te na momento di ciere di edicion no a ricibi respuesta di e mandatario.
